Bahreındegi birinshi burylysqa Shýmaherdiń aty beriledi
ASTANA. QazAqparat - Bahreın júldesin uıymdastyrýshylar joldyń birinshi burylysyn «Formýla-1» jarysynyń jeti márte jeńimpazy Mıhael Shýmaherdiń atymen ataıtynyn málimdedi, dep habarlaıdy F1News. Osydan on jyl buryn nemis avtoshabandozy atalǵan joldyń jobasyn, onyń ishinde alǵashqy burylysyn salýǵa ózi qatysqan.
«Shýmaherdiń otbasy Bahreındegi halyqaralyq avtodromǵa Mıhaeldiń avtosporttaǵy eńbegin elegeni úshin alǵysyn bildiredi. Meniń oıymsha, Mıhaeldiń ózi de buny maqtan tutar edi», - deıdi sportshynyń menedjeri Sabıne Kem. Budan buryn habarlaǵanymyzdaı, 45 jastaǵy Mıhael Shýmaher eki aıdan beri es-tússiz jatyr. 29 jeltoqsanda ol Frantsııanyń Alpi taýlarynda syrǵanap júrgeninde taý shańǵysynan qulap, basyna asa aýyr zaqym kelgen bolatyn. Qazir álemniń eń tanymal avtoshabandozy Grenobldaǵy aýrýhanalardyń birinde jatyr. Sońǵy aqparat boıynsha, qabyldap jatqan em-domnan esh nátıje shyqpaǵasyn, dárigerler ony komadan shyǵarý terapııasyn toqtatty.
