Bahreındegi dron shabýylynan zardap shekkender sany 32 adamǵa jetti
ASTANA. KAZINFORM - Bahreın aýmaǵyna Iran tarapynan jasalǵan dron shabýyly saldarynan zardap shekkender sany 32 adamǵa deıin artty. Bul týraly Anadolu Ajansı habarlady.
Bahreın Densaýlyq saqtaý mınıstrliginiń málimetinshe, 9 naýryz kúni zardap shekkenderdiń tórteýiniń jaǵdaıy aýyr.
Al Bahreın Іshki ister mınıstrligi ushqyshsyz ushý apparattarynyń shabýyly kezinde jaǵalaýda ornalasqan Sıtra qalasyndaǵy kóptegen turǵyn úıge zaqym kelgenin málimdedi.
Sonymen qatar Bahreınniń memlekettik munaı-gaz kompanııasy Bapco Energies 9 naýryz kúni Taıaý Shyǵystaǵy bolyp jatqan óńirlik qaqtyǵys pen munaı óńdeý keshenine jasalǵan sońǵy shabýylǵa baılanysty fors-major jarııalaǵan.
Taıaý Shyǵystaǵy shıelenistiń kúsheıýi
28 aqpan kúni Izraıl men AQSh Iranǵa qarsy soqqylar jasaı bastady. Shabýyldar Irannyń ıadrolyq baǵdarlamasyna qatysty kelissózder júrip jatqan kezeńde júzege asqan.
Buǵan jaýap retinde Iran Izraılge, sondaı-aq óńirdegi AQSh áskerı bazalary ornalasqan birqatar elge — Katar, Birikken Arab Ámirlikteri jáne Bahreınge soqqy jasaǵan.
AQSh pen Izraıl shabýyldarynyń saldarynan Irannyń joǵarǵy jetekshisi Álı Hameneı jáne birqatar joǵary laýazymdy tulǵa qaza tapqan.
Osyǵan deıin Iran Parsy shyǵanaǵyndaǵy AQSh-tyń áskerı nysandaryna shabýyl jasaǵany týraly jazdyq.