Bahreınde 36 boıjetkendi jezókshelikpen aınalysýǵa májbúrlegender sottaldy
Shymkenttiń qylmystyq ister jónindegi mamandandyrylǵan aýdanaralyq soty transulttyq uıymdasqan top quryp, tórt jyl boıy adam saýdasymen aınalysqandarǵa úkim kesti. 16 sottalýshynyń aldy 14 jylǵa jaza arqalady. Sot zalynda buǵan deıin úıqamaqta bolǵan bir azamattyń qolyna kisen salyndy. Úsh jylǵa jaza arqalaǵan ol jazasyn qaýipsizdigi barynsha joǵary túzeý kolonııasynda óteıtin bolady. Al, úsh aıyptalýshy qamaýdan bosatyldy.
«Olar sot úkimimen qylmystyq jaýaptylyqtan bosatyldy. Óıtkeni Qylmystyq kodekstiń 68-shi babynyń ekinshi bóliginiń talaptary boıynsha olar jábirlenýshilermen tatýlassa jáne olarǵa keltirilgen zalaldyń mólsherin ótese jazadan bosatylýǵa bolady degen qaǵıdalar bar. Sot olardyń árqaısysynyń tek qana bir bir qylmystyq árekteterge qatystylyǵy ekendigin, ár qaısysynyń jasóspirim balalary bar ekendigin, olardyń asa bir qoǵamǵa qaýip týdyryp turmaǵanyn eskere kele osy bapty qoldaný durys degen sheshimge keldi», - dedi isti qaraǵan sot tóraǵasy Ábsattar Shaıhıddınov.
Aıta óteıik, bul qylmystyq top 2016 jyldan bastap 2020 jylǵa deıin el aýmaǵynda Bahreın Koroldigine jezókshelikpen aınalysý úshin qyzdardy jaldaýmen jáne jiberýmen aınalysyp kelgen. Olardyń basym bóligi Túrkistan oblysy men Shymkent qalasynyń týmalary. Jábirlenýshiler de osy eki óńirdiń qyzdary. Olardy aıyptalýshylar «kóp aqsha tabasyń» dep aldap shet el asyryp, qujattaryn alyp qoıǵan. Sóıtip jezókshelikke jekken. Negizinen qarmaqtaryna turmysy tómen jandardy túsirip kelipti. 150 tomdyq qylmystyq is boıynsha basty fıgýrant - 36 jastaǵy kelinshek. Ol Bahreın Koroldigine Qazaqstan aýmaǵynan jas qyzdardy jetkizip otyrǵan. Qylmystyq top basshysy adam saýdasy boıynsha tórt jyl kóleminde jalpy somasy 48 mln teńgeden astam tabys tapqany anyqtalǵan.
«Qazaqstannan árbir jiberilgen qyzdar úshin eki myńnan bes myń dollarǵa deıin aqsha túsip otyrǵan. Jáne ol aqshany negizinen sol Azadova Saodattyń ózi alyp, sol kisi basshylyq jasap otyrǵan. Osyndaı jolmen 2016 jyldan 2020 jylǵa deıin 36 jábirlenýshi qyzdy jibergen. Aralarynda onyń ishinde kámeletke tolmaǵandar da bar», - dedi sýdıa.
Eske salaıyq, «Bahreın isi» ótken jyldyń aqpan aıynda belgili bolǵan edi. Bahreın Koroldiginde 21 qazaqstandyq qyzdyń seksýaldyq quldyqtan bosatylǵany týraly habarlanǵan. Qylmystyq top músheleri qurbandaryn kóbine ońtústik óńirden tańdap alyp, negizinen turmystyq deńgeıi tómen otbasylardan shyqqan boıjetkenderge shetelde qyzmet kórsetý jáne qonaqúı salasynda jumys isteýdi usynyp, tuzaqtaryna túsirip otyrǵan. Transulttyq uıymdasqan toptyń quramynda qazaqstandyqtardan bólek, Reseı jáne Bahreın azamattary da bolǵan degen aqpar aıtylǵan bolatyn.