Bahreın Koroli Astanada ótetin IYU sammıtine qatysady
Sapar barysynda Arnaıy ókil Bahreın Koroli Hamad ben Isa Ál Halıfanyń qabyldaýynda bolyp, atalǵan eldiń Syrtqy ister mınıstri sheıh Haled ben Ahmad Ál Halıfamen jáne Bilim mınıstri Májıt ben Álı Ál-Nýeımımen ekijaqty kezdesý ótkizdi.
A. Kamaldınov Korol Hamad ben Isa Ál Halıfaǵa Qazaqstan Prezıdenti Nursultan Nazarbaevtyń 2017 jylǵy 10-11 qyrkúıekte Astanada ótetin Islam yntymaqtastyǵy uıymynyń (IYU) Ǵylym jáne tehnologııalar jónindegi birinshi sammıtine qatysý úshin joldaǵan shaqyrýyn tapsyrdy. Atalǵan bastamany Memleket basshysy birinshi ret 2016 jylǵy sáýirde Ystanbulda ótken 13-shi IYU Sammıti sheńberinde jarııa etken bolatyn.
Ǵylymı jáne tehnologııalyq áleýetti damytý salasynda musylman qaýymynyń kúsh-jigerin biriktirýge baǵyttalǵan Astana sammıtine Uıymǵa múshe barlyq memleketter (55 el), sondaı-aq baıqaýshy memleketter men birqatar basqa da halyqaralyq jáne óńirlik uıymdardyń birinshi jetekshileri shaqyrylady. Sammıt qonaqtarynyń 10 qyrkúıekte «EKSPO-2017» halyqaralyq mamandandyrylǵan kórmesiniń resmı jabylý saltanatyna qatysýlary da kútilip otyr.
Bahreın Koroli Memleket basshysynyń shaqyrýyn úlken rızashylyqpen qabyl aldy jáne bul bastamanyń Islam áleminiń ilgerileýi men damýyn qoldaýǵa qatysty kúsh-jiger turǵysynda mańyzdy ekendigin atap ótti. Ol Prezıdent N. Nazarbaevtyń bitimger jáne ǵalamdyq saıasatker retindegi róline joǵary baǵa berdi.
Osyǵan baılanysty bahreındik monarh aldaǵy IYU Sammıtine óziniń qatysýy týraly nıetin bildirdi.
Sonymen qatar, Qazaqstan Prezıdentiniń Arnaıy ókili Memleket basshysynyń ártúrli janjaldardy sheshý boıynsha strategııalyq maqsatqa qol jetkizý men musylman elderiniń ekonomıkalyq yntymaqtastyǵy úshin qolaıly jaǵdaı týdyrýǵa baǵyttalǵan ózge de aıtýly bastamalary - Islamdyq tatýlasý úderisi jáne «Islamdyq ınfraqurylymdyq ıntegratsııa» baǵdarlamalyq qujatyn ázirleý týraly aıtty.
Jalpy alǵanda, taraptar kelissózder barysynda Astana men Manama arasyndaǵy ártúrli salalardaǵy ekijaqty yntymaqtastyqty belsendirý joldaryn, sondaı-aq eki eldiń halyqaralyq uıymdar, sonyń ishinde IYU sheńberindegi ózara is-qımylynyń jaǵdaıy men bolashaǵyn talqylady.
Bahreınniń Syrtqy ister mınıstri sheıh Haled ben Ahmad Ál Halıfamen bolǵan kezdesýde ekijaqty yntymaqtastyqtyń, sondaı-aq halyqaralyq jáne aımaqtyq saıasattyń ózekti máseleleri talqylandy. Jýyq arada Qazaqstan-Bahreın úkimetaralyq komıssııasyn qurý, syrtqy ister mınıstrlikteri arasynda konsýltatsııalar ótkizý, negizgi ekijaqty qujattarǵa qol qoıý, bahreındik bıznes-delegatsııanyń Qazaqstanǵa saparyn uıymdastyrý jáne t.b. boıynsha ýaǵdalastyqtarǵa qol jetkizildi.
Koroldiktiń Bilim mınıstri Májıt ben Álı Ál-Nýeımımen kezdesýde bilim baǵdarlamalary sheńberindegi yntymaqtastyq salasyndaǵy eki eldiń ózara is-qımylyn damytý joldary, stýdenttermen jáne ǵylymı ortalyqtar arasyndaǵy tájirıbemen almasý jáne t.b. qarastyryldy.
