Bahreın koroli 450-den astam tutqynǵa raqymshylyq jasady
ASTANA. KAZINFORM – Bahreın koroli Hamad bın Isa al-Halıfa el bıleýshisi bolǵanyna 25 jyl tolýyna oraı sársenbi kúni 457 tutqynǵa raqymshylyq jasady.
«Koroldik keshirim Mártebeli Koroldiń áleýmettik kelisimdi nyǵaıtýǵa jáne ádildik pen zań ústemdigi qaǵıdattaryn qoldaýǵa degen umtylysyn kórsetedi», - dep habarlaıdy Bahreın aqparat agenttigi.
El bıliginiń habarlaýynsha, bul sheshim sottalǵandardyń gýmanıtarlyq jáne áleýmettik jaǵdaıymen zańdy jaýapkershilikti teńestirýge, olardyń qoǵamǵa qaıta beıimdelýine múmkindik berýge baǵyttalǵan.
«Bul tásil Bahreınniń adam quqyqtaryn saqtaý jónindegi mindettemesine jáne onyń aımaqtaǵy kórnekti ustanymyna sáıkes keledi», - delingen málimdemede.
Bahreın Ókilder keńesi (parlament) spıkeriniń aıtýynsha, keshirim jasaý qoǵamdy biriktirýge yqpal etedi.
«Keshirim Mártebeli myrzanyń janashyrlyǵy men barlyq azamattyń ál-aýqatyna degen adaldyǵyn kórsetedi. Bul qadam otbasylyq baılanystardy nyǵaıtady jáne keshirimge ushyraǵandardy qoǵamǵa qaıta qosýǵa kómektesedi, áleýmettik birlikke yqpal etedi», - dedi Bahreın Ókilder keńesiniń (parlament) spıkeri Ahmed bın Salman al-Mýsallam.
Osy jyldyń sáýir aıynda Hamad patsha bılikke kelgendegi kúmis mereıtoıyna oraı 1584 tutqynǵa, onyń ishinde jappaı tártipsizdik pen qylmystyq ister boıynsha sottalǵandarǵa raqymshylyq jasady.
