Bahreın Irannyń jańa dron shabýylyn toıtardy

ASTANA. KAZINFORM — Parsy shyǵanaǵynda AQSh pen Iran arasyndaǵy shıelenis sheshilmeı tur, osy tusta Bahreındegi áskerı nysandarǵa taǵy bir shabýyl jasaldy, dep habarlaıdy Kazinform agenttiginiń Taıaý Shyǵystaǵy menshikti tilshisi.

Bahreın Irannyń jańa dron shabýylyn toıtardy
Foto: Fars News

17 qarasha, seısenbi kúni Bahreın qarýly kúshteri sheıh Isa áýe bazasyndaǵy AQSh radar stansasyna baǵyttalǵan Iran drondaryn qaǵyp túsirgenin habarlady.

Irannyń Islam revolıýtsııasy saqshylar korpýsy (IRGC) operatsııa týraly málimdeme jasap, shabýyldyń AQSh áskerı drondarynyń Iran áýe keńistigin buzýyna jaýap retinde jasalǵanyn atap ótti. 

Sonymen qatar, AQSh Ortalyq qolbasshylyǵy (CENTCOM) shabýyldy rastap, Iran ushyrǵan barlyq drondar sátti qaǵyp túsirilgenin málimdedi.

— Búgin IRSK Bahreınge qaraı ushyrǵan birneshe bir jaqty shabýyl drondary qaǵyp túsirildi. Amerıkanyń qondyrǵylaryna eshqandaı zaqym kelmedi jáne AQSh qyzmetkerleri arasynda zardap shekkender joq, — delingen qolbasshylyq málimdemesinde.

 

Buǵan deıin Bahreınniń Іshki ister mınıstrligi yqtımal qaýip týraly shuǵyl eskertý jasap, patshalyq azamattary men turǵyndaryn jaqyn mańdaǵy qaýipsiz jerlerden baspana izdeýge shaqyrǵan bolatyn. Artynsha astana Manamada jarylys dybystary estildi.

Keıinirek bılik tikeleı qaýiptiń seıilgenin habarlady, biraq saqtyq sharalaryn saqtaý qajettigin eskertti.

Bul oqıǵa IRSK sońǵy kúnderi habarlaǵan birqatar shabýyldardyń biri. 13 qarashada Iran AQSh-tyń Bahreındegi erte eskertýge arnalǵan radar stansasynyń joıylǵanyn, 
al 15 qarashada Rıfah mańyndaǵy radar keshenine alty dronnyń soǵylǵanyn týraly habarlady. AQSh áskerı kúshteri buǵan deıin óz nysandaryna keltirilgen zalaldy joqqa shyǵarǵan edi.

Aıta keteıik, Bahreın — AQSh-tyń Parsy shyǵanaǵyndaǵy negizgi áskerı seriktesteriniń biri. AQSh Áskerı-teńiz kúshteriniń Besinshi flotynyń shtab-páteri osy patshalyqta ornalasqan.