Bahargúl Tólegenqyzy: Kollektsııamda myńnan astam antıkvarlyq buıym bar
ASTANA. KAZINFORM – Qazaqstannyń naryǵynda ulttyq káde syı mádenıetin qalyptastyryp, umyt qalǵan jádigerlerdi qaıta tiriltken belgili kollektsıoner-etnograf Bahargúl Tólegenqyzynyń bul salada júrgenine 30 jyl toldy. Búginde onyń jeke qorynda bizdiń zamanymyzdyń I ǵasyrynan bastap, XVIII-XIX ǵasyrlardy qamtıtyn myńnan astam biregeı eksponat saqtaýly. Elordadaǵy EKSPO aýmaǵynda ashylǵan «Jaýhar jádiger» kórmesi men ulttyq ónerdi dáripteýdiń mańyzy týraly kollektsıoner egjeı-tegjeıli baıandap berdi.
Bahargúl Tólegenqyzynyń ónerge degen qushtarlyǵy bala kúninen, anasynyń is-tigip, ıne sabaqtaǵanyn kórip óskennen bastalǵan. Stýdenttik jyldary Beıjińde oqyp júrip, ımperatorlar saraıyndaǵy 5 myń jyldyq tarıhqa tańdaı qaqqan ol, elge oralǵan soń qazaqtyń tól ónerin jınaqtaýdy qolǵa alady.
– 1996 jyldan bastap qazaq halqynyń jáne Orta Azııa halyqtarynyń dúnıelerin júıeli túrde jınaı bastadym. Basynda shetelden alyp kelgen antıkvarıat dúnıelerimdi ózge ult ókilderine berip, onyń ornyna qazaqtyń qaımaǵy buzylmaǵan ulttyq buıymdaryn aıyrbastap aldym. Qazir qolymda 40-50 sandyqqa júk bolatyn jádiger bar. Olardyń ishinde I-III ǵasyrlardaǵy teńgeler, VII-VIII ǵasyrdaǵy Túrki dáýiriniń qarý-jaraqtary men Otyrar keramıkasy bar, - deıdi Bahargúl Tólegenqyzy.
Kollektsıoner tek jádiger jınap qana qoımaı, Qazaqstandaǵy alǵashqy jeke mýzeılerdiń birin ashqan. 2011 jyly Almatyda irgetasy qalanǵan bul ortalyq 10 jyl boıy halyqqa, ásirese jastarǵa tegin qyzmet kórsetip, tanymdyq alańǵa aınaldy. Qazirgi tańda bul biregeı kollektsııa Astana ákimdiginiń qoldaýymen «Nur Álem» pavılonynyń birinshi qabatynda kópshilik nazaryna usynylyp otyr.
Sonymen qatar Bahargúl Tólegenqyzy táýelsizdiktiń alǵashqy jyldarynda «káde syı» ataýynyń qazaq leksıkonyna enýine de septigin tıgizgen.
– Ol kezde sývenır dep aıtatynbyz. Sol kezde redaktor Marat Toqashbaev aǵamyzdan keńes suraǵanymda, ol kisi bul uǵymdy káde syı dep ataýdy usyndy. Sodan beri Ádemi-aı kompanııasy arqyly myńnan astam káde syı túrin shyǵardyq, - dep túıindedi ol.
Búginde Bahargúl Tólegenqyzy elordada jeke ulttyq óner ortalyǵyn ashýdy josparlap otyr. Bul ortalyq qazaq halqynyń at ábzelderinen bastap, zergerlik buıymdaryna deıingi qundy murany bir arnaǵa toǵystyratyn biregeı nysan bolmaq.
Aıta keteıik, buǵan deıin tól teńgemizden kollektsııa jınaıtyn aqtóbelikterdiń jumysy jaıly jazǵan edik.
