Baǵlan Іńkárbek: Osy tarıhı sát úshin qanshama ter tógildi

ıABÝLI. KAZINFORM — Biz qanshama qıyndyqtarǵa moıymaı, osy jeńiske jettik. Frıstaıl-akrobatıkadan Qazaqstan ulttyq quramasynyń bapkeri Baǵlan Іńkárbek marapattaý rásiminen keıin Kazinform tilshisine bergen eksklıýzıvti suhbatynda osylaı dedi.

Baǵlannyń aıtýynsha, qurama osy tarıhı kún úshin kóp eńbek etken.

— Iá, bul tarıhı altyn, tarıhı sát boldy. Osy kúnge deıin qanshama eńbek, qanshama ter tógildi. Qanshama qıyndyqtar bolsa da moıymaı, eńbek etýdi toqtatpaı osy kúnge jettik dep oılaımyn, — dedi ol.

Bapker osy sátte kóńili tolqyp turǵanyn jasyra almady. 

— Aıtarym óte kóp, alaıda qazirgi sátte qatty tolqyp turmyn. Qytaı elinde, olardyń óz alańdarynda altyn alý óte qıyn, — deıdi Baǵlan.

Aıta keteıik, Frıstaıl-akrobatıkadan Qazaqstan ulttyq quramasy Harbın qysqy Azııa oıyndarynda el qorjynyna tórt medal syılady.

Olardyń qatarynda, Sherzod Hashırbaev jáne Roman Ivanov frıstaıl-akrobatıkadan erler arasynda sınhrondy sekirý synynda 97.92 upaı jınap, el qorjynyna ekinshi altyn medal syılady.

Sonymen qatar, qazaqstandyq qyzdar Ardana Mahanova jáne Aıana Joldas frıstaıl-akrobatıkadan áıelder arasynda sınhrondy sekirý synynda 59.16 upaı jınap, úshinshi orynnan kórindi.

Aralas komandalyq synda, otandastarymyz 235.39 upaı jınap, kúmis júldeger atandy.

Osyǵan deıin habarlaǵanymyzdaı, Aıana Joldas qysqy Azıa oıyndarynyń áıelder arasynda frıstaıl-akrobatıka synynda úshinshi bolǵan edi.