Baǵlan Maılybaev merziminen buryn bosap shyqty
NUR-SULTAN. QazAqparat – QR Prezıdenti Ákimshiligi basshysynyń burynǵy orynbasary Baǵlan Maılybaev merziminen buryn bosap shyqty. Bul týraly QazAqparat Nur-Sultan qalalyq sotyna silteme jasap habarlaıdy.
«Sottalǵan B. Maılybaev jazasynyń ótelmegen bóligi boıynsha merziminen buryn bosap shyǵý týraly ótinish bildirdi. Sot ótinishti qaraı otyryp, onyń zańmen belgilengen jazasyn, mekeme ákimshiliginiń oń minezdemesin, ishki tártip erejelerin saqtaýyn, eskertý almaǵanyn, 9 birdeı kótermeleýge ıe bolǵanyn, ózin ustaýdyń úshinshi oń deńgeıin, jumysqa turý múmkindiginiń baryn, is boıynsha basqa aryzdyń joqtyǵyn nazarǵa aldy. Osyǵan baılanysty Nur-Sultan qalasynyń Baıqońyr aýdandyq №2 soty 2020 jyldyń 14 mamyrynda B.Maılybaevtyń merziminen buryn bosatý týraly ótinishin qanaǵattandyrdy. Ol aıaqtalmaǵan 1 jyl 4 aı 21 táýliktik merziminde probatsııalyq baqylaýda bolady», - dep habarlaıdy sottan.
Sonymen qatar sot B.Maılybaevqa ishki ister organdaryna kelip esep berip turýǵa, turǵylyqty jerinen ketpeýge jáne aýystyrmaýǵa, jumystan tys ýaqytta ishki ister organdary ruqsat etpeıtin oryndarǵa barmaýǵa, QR aýmaǵynan tys jerge barmaýǵa mindettedi.
Eske salsaq, 2017 jylǵy 13 maýsymda Astana qalasy №2 Esil aýdandyq soty QR QK-niń 361-babynyń 4-bóligi, 185-babynyń 3-bóliginde qarastyrylǵan qylmystardy jasaǵanyn moıyndaý týraly kelisimmen sotqa kelip túsken Maılybaev Baǵlan Asaýbaıulyna jáne Galıhın Nıkolaı Nıkolaevıchke qatysty qylmystyq isti qarap, sot úkimimen B.Maılybaev joǵaryda kórsetilgen baptar boıynsha kináli dep tanyldy jáne oǵan múlki tárkilene otyryp, memlekettik organdarda laýazymdy atqarý quqyǵynan ómir boıyna aıyryp, 5 jylǵa bas bostandyǵynan aıyrý jazasy taǵaıyndalǵan bolatyn.
