Baǵlan Kenjebek álem kýbogynda armenııalyq boksshyǵa ese jiberdi
ASTANA. KAZINFORM — World Boxing federatsııasynyń uıymdastyrýymen ótip jatqan álem kýbogynda búgin, 21 sáýirde el quramasynan Baǵlan Kenjebek (55 keli) jarys jolyn aıaqtady. Bedeldi báseke Brazılııanyń Fos-dý-Igýasý qalasynda 20-26 sáýir aralyǵynda ótip jatyr.
Otandasymyz birinshi aınalymda Armenııa sportshysy Jıraır Sargsııanmen judyryqtasyp, 2:3 esebimen ese jiberdi.
Endi el quramasynan keshki sessııada Qazaqstan ýaqytymen 3:00–de Muhammedsabyr Bazarbaıuly (65 keli) týnıstik Hassen Atıamen sharshy alańǵa shyǵady.
Aıta ketsek, budan buryn Nazym Qyzaıbaı (54 keli) Túrkııa ókili Aısen Taskınnen 4:1 esebimen basym tústi.
El quramasynan Janseri Kósherbaev (60 keli), Dáýlet Tólemisov (90 keli) jarysty erte aıaqtaýǵa májbúr boldy.
Sondaı-aq álem kýbogynda olardan basqa erler quramasynan Danııal Sábıt (50 keli), Sanjaráli Begalıev (75 keli), Sultan Aıbaruly (85 keli) sharshy alańǵa shyǵady.
Al áıelder quramasynda Alýa Balqybekova (55 keli), Vıktorııa Grafeeva (60 keli), Aıda Ábikeeva (65 keli), Natalıa Bogdanova (70 keli), Jibek Jarasqyzy (80 keli), Valerııa Aksenova (80 keliden joǵary) bar.
Kúndizgi sessııa Qazaqstan ýaqytymen 19:00 -de jáne keshki sessııa 01:00–de bastalady.
