Baǵdatta AML 34-shi sammıti ótip jatyr: basty taqyryp – Gazadaǵy soǵys
ASTANA. KAZINFORM – Senbi kúni Irak astanasynda Arab memleketteri lıgasynyń (AML) 34-shi sammıti bastaldy. Jıynnyń basty taqyryby Gaza sektoryndaǵy uzaqqa sozylǵan qarýly qaqtyǵys, taraptardy tatýlastaryp, palestınalyq anklavtyń qıraǵan ınfraqurylymyn qalpyna keltirý, dep habarlaıdy Kazinform mnshikti tilshisi.
Baǵdatqa jınalǵan arab kóshbasshylary Izraıldiń Gazadaǵy áreketterin qatty synap, shuǵyl túrde áskerı áreketterdi toqtatýdy talap etti.
Jıynnyń resmı ashylýy Bahreın Syrtqy ister mınstriniń orynbasary Abdýllatıf az-Zaıanıdiń sózinen bastaldy, sebebi Manama buǵan deıin AML-ǵa tóraǵa bolǵan. Ol Bahreınniń Gazany qalpyna keltirip, atysty toqtatý týraly kelisimdi qoldaýǵa daıyn ekenin jetkizdi.
Irak prezıdenti Abdel Latıf Rashıd Izraıldiń agressııasyn synap, palestınalyqtardy kúshtep kóshirýge degen kez kelgen áreketke jol bermeý kerektigin aıtty.
- Bizdiń qaýipsizdigimiz bárimizge ortaq, ol bólinbeıdi, - dep málimdedi ol óńirde ujymdyq qaýipsizdikti nyǵaıtýǵa shaqyra otyryp.
Sammıt Baǵdatta 2012 jyldan beri alǵash ret ótip jatyr.
Jıynǵa AML-nyń kópshiliginiń kóshbasshylary men ókilderi qatysyp jatyr. Olardyń arasynda Qatar ámiri sheıh Tamım bın Hamad Ál Tanı, Mysyr prezıdenti Abdel-Fattah as-Sısı, Palestına basshysy Mahmýd Abbas, Somalı basshysy Hasan Sheıh Mahmýd bar. Iordanııanyń atynan premer-mınıstr Djafar Hassan kelse, Lıvannan úkimet basshysy Navaf Salam ókildik etip otyr.
Sammıtke qurmeti qonaq retinde BUU Bas hatshysy Antonıý Gýterrısh pen Ispanııa premer-mınıstri Pedro Sanches shaqyrylǵan.
Irak premer-mınıstri Mýhammed Shıa as-Sýdanı óziniń sózinde Izraıldiń Gazadaǵy áreketin genotsıd dep baǵalap, qıraǵan eldi qalpyna keltirý boıynsha arab qoryn qurýǵa shaqyrdy.
Irak qorǵa Gaza men Lıvanǵa kómek retinde 20 mln dollar quıýǵa daıyn ekenin jetkizdi.
BUU Bas hatshysy Antonıý Gýterrısh «Palestına halqyn ujymdasyp jazalaýdy eshkim de aqtamaıdy» deı kele halyqty kúshtep qonystandyrýdyń kez kelgen túrine qarsy ekenin bildirdi.
Mysyr prezıdenti as-Sısı Izraıldi palestınalyqtardy joıý maqsatymen júıeli túrde qylmys jasady dep aıyptady.
Ol Kaırdiń Qatar men AQSh-tyń araaǵaıyndyǵymen taraptardy tatýlastyrýǵa kúsh salyp jatqandyǵyn jáne Gazany qalpyna keltirý boıynsha halyqaralyq konferentsııa ótkizýdi josparlap otyrǵanyn atap ótti.
Palestına prezıdenti Mahmýd Abbas HAMAS pen ózge toptardy qarý-jaraq pen Gaza sektoryna baqylaýda Palestına ákimshiligine berýge shaqyrdy.
Sammıt qorytyndysy boıynsha bes sheshýshi áreket boıynsha kún tártibi bekitildi. Olar: Palestına máselesi, Iemen, Sýdan, Sırııa men Lıvııadaǵy qaqtyǵystar jáne Iran men AQSh arasyndaǵy ıadrolyq kelisim boıynsha kelissózder.
Qatysýshylar tatýlastyrý men soǵystan keıingi qalpyna keltirýge kúsh salýǵa daıyn ekendikterin rastady.
Aıta keteıik, osyǵan deıin Izraıl áskerleri HAMAS-ty talqandap, Gazada kepilde qalǵan adamdardy bosatý úshin aýqymdy shabýyldy bastaǵanyn málimdegen bolatyn.