Baǵdat Mýsınniń qyzmetinen ketýi jeke derekterdiń taralý faktisine qatysty ma – depýtat pikiri

ASTANA. KAZINFORM – Májilistiń jalpy otyrysynan keıin BAQ ókilderi depýtat Ekaterına Smyshlıaevadan Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsınniń qyzmetinen ketýine qatysty oıyn surady.

Naqty aıtqanda, «Baǵdat Mýsınniń qyzmetinen ketýi qazaqstandyqtardyń jeke derekteriniń taralý faktisimen baılanysty ma?» degen saýal qoıyldy. 

«Mınıstrdiń qyzmetinen ketý sebebin oıdan shyǵarǵym kelmeıdi, sondyqtan naqty bir pikir aıta almaımyn. Sondaı-aq, qazaqstandyqtardyń jeke dereginiń taralýyn saıası tulǵalardyń kelip, ketýimen baılanysty emes dep oılaımyn. Tsıfrlandyrý salasyn arttyrǵan jerde táýekel qatar júredi, onyń ishinde jeke derekter de bar», - dep jaýap berdi Ekaterına Smyshlıaeva Májilis kýlýarynda. 

Sonymen qatar halyq qalaýlysy Baǵdat Mýsınniń ornyna kim kelýi múmkin degen boljamǵa qatysty oıyn aıtty. 

«Endi kim mınıstr bolady degen suraqqa qatysty aldyn ala boljam jasamaı-aq qoıaıyq. Kandıtat usynylǵan soń talqylaıtyn bolamyz, bizde ýaqyt bar. Bizdiń komıtet ádette kandıdatpen egjeı-tegjeıli suhbattasady. Oǵan tıisti suraqtar qoıylady, salaǵa qatysty máselelermen jaqsy tanyspyz jáne kandıdattardyń jaýabyna baılanysty bolady dep oılaımyn», - deıdi ol. 

Aıta keteıik, 30 sáýirde Memleket basshysynyń Jarlyǵymen Baǵdat Mýsın Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstri laýazymynan bosatyldy.