Baǵdat Mýsın: Uıaly ınternet pen qońyraý shalý tarıfteri teńestirilmeıdi

NUR-SULTAN. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın salaǵa qatysty taraıtyn tanymal feıkterge túsinikteme berdi, dep habarlaıdy QazAqparat.

«Búgin jazdyń sońǵy kúni. Barshańyzǵa jaqsy kún tilegim keledi jáne jelide taratylatyn jalǵan aqparatqa kóńil aýdarmaýǵa keńes bergim keledi. Jumysqa kele jatyp osyndaı «jańalyqtardyń» shaǵyn tizimin jasadym», - dep jazdy ol Facebook-tegi paraqshasynda.

Onyń aıtýyna qaraǵanda áleýmettik jelini buǵattaı vedomstvonyń kún tártibinde turǵan joq.

«Áleýmettik jelilerdi buǵattaý Tsıfrlyq damý, ınnovatsııalar jáne aeroǵarysh ónerkásibi mınıstrliginiń josparynda joq jáne bolmaıdy da. Muny biz byltyr da taqylaǵan bolatynbyz. Biraq bireýler sol áńgimeni bıyl taǵy kóteripti», - dedi mınıstr.

Sondaı-aq, ol uıaly baılanys arqyly beriletin ınternettiń tarıftiń ósetini týraly qaýesetke de jaýap berdi.

«Internet trafıginiń tarıfteri qońyraý shalý tarıfimen teńestirilmeıdi. Mınıstrlik WhatsApp-taǵy qońyraýlar men habarlamalar úshin aqy alyp júrgen joq jáne olaı bolmaıdy.

Óz serverlerin Qazaqstanǵa kóshirgen domender árqashan áriptesterinen keńes alyp, kómekterine júginip, baılanysta bola alady. Bizdiń mindetimiz – el aýmaǵynda derbes derekterdiń qaýipsizdigin jáne saqtalýyn qamtamasyz etý. Qazaqstanda eshkim eshteńeni bir-aq sátte óshirip tastaıyn dep jatqan joq», - dep túıindedi Baǵdat Mýsın.