Baǵdat Mýsın Ulttyq keńes múshelerimen kezdesti

NUR-SULTAN. QazAqparat - 13 qarashada Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın jáne Ulttyq keńesi músheleriniń onlaın kezdesýi ótti, dep habarlaıdy QazAqparat.

Kezdesý barysynda Baǵdat Mýsın mınıstrlik jumysynyń negizgi baǵyttary jóninde jáne aldaǵy ýaqytta iske asyratyn jobalary boıynsha aqparatpen bólisti.

Atap aıtqanda, mınıstr memlekettik elektrondyq portaldardy jetildirý, onlaın formatta memlekettik qyzmetterdi paıdalaný úderisterin ońaılatý boıynsha júrgizilip jatqan jáne josparlanǵan jumystar jóninde aıtyp ótti. Oǵan qosa, halyq tyǵyz ornalasqan jáne shalǵaıda jatqan eldi mekenderdi keńjolaqty ınternetpen qamtamasyz etý, baılanys sapasy boıynsha operatorlarǵa qatysty talaptardy jetildirý, otandyq IT-qyzmetiniń eksportyn ulǵaıtý, sonymen birge, biriktirilgen aqparattyq bazalardy qoldanýdy damytý jáne derbes derekterdi qorǵaý boıynsha suraqtarǵa toqtaldy.
Óz kezeginde Ulttyq keńes músheleri mınıstrge aýyldyq eldi mekenderdi ınternetpen qamtý, múmkindigi shekteýli azamattardyń egov portalyn jáne basqa memlekettik organdardyń saıttaryn paıdalaný múmkindikterin jaqsartý, ártúrli baǵyttaǵy aqparat bazalaryn biriktirý boıynsha suraqtar qoıdy.

Sondaı-aq, Ulttyq keńes músheleri aeroǵarysh ónerkásibin damytý, IT-mamandardy daıarlaýdy jetildirý boıynsha óz usynystaryn berdi.