Baǵdat Mýsın Shymkent qalasyn tsıfrlandyrý barysymen tanysty

ShYMKENT. QazAqparat - Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın jumys saparymen Shymkent qalasynda júr. Vedomstvo basshysy qalany tsıfrlandyrý barysymen tanysyp, birqatar nysandardy aralady, dep habarlaıdy QazAqparat.

Jumys sapary barysynda Baǵdat Mýsın qala ákimi Murat Áıtenovpen kezdesip, Shymkenttiń tsıfrlyq damý salasyndaǵy aǵymdaǵy jaı-kúıi men aldaǵy jylǵa arnalǵan josparlardy talqylady.

Mınıstrlik basshysy Kókbulaq turǵyn alabynda bolyp, turǵyndarmen kezdesip, baılanys qyzmetiniń sapasyn tekserdi.

Búgingi tańda Kókbulaqta WCDMA jáne LTE tehnologııalaryn paıdalanatyn uıaly baılanys operatorlarynyń bazalyq stantsııalaryna arnaıy antennalar ornatylǵan.

Jumys sapary barysynda qoǵamdyq qalalyq kólikte Mınıstrge elektrondyq bıletteý júıesi tanystyryldy. Sonymen qatar, Baǵdat Mýsın jeke kompanııa men qala ákimdiginiń birlesken «Samokat Sherıng» jobasymen tanysty.

Mınıstr Silkway Halyqaralyq ýnıversıtetine baryp, onda Baǵdat Mýsınge «SMART Hub SILKWAY» IT-ortalyǵynyń «Aqyldy jaıaý júrginshi», 3D modeldeý, «Digital Shymkent», «Aqyldy Qúnbaǵys» jáne AntiCOVID jobalary tanystyryldy. Sondaı-aq, óńirlik IT-ortalyqtyń Astana Hub halyqaralyq tehnoparkimen yntymaqtastyǵy talqylandy.

«Árbir óńirde IT-mamandardyń damýy mańyzdy. Túrkistan oblysy men Shymkent qalasynda IT-mamandardyń sany az, biraq talpynys bar.

Sol sebepti, bizdiń taraptan, óńirlerde IT-mektepter ashatyn bolamyz», – dep atap ótti Baǵdat Mýsın.

Budan basqa, Mınıstr Shymkent munaı óńdeý zaýytynda jáne «Sý resýrstary-Marketıng» JShS-de boldy.