Baǵdat Mýsın sheteldik kóligin zańdastyryp júrgen astanalyqtarmen kezdesti
Bul týraly mınıstrdiń ózi Telegram arnasynda jazdy.
«Ózderińiz biletindeı, qazir sheteldik kólikterdi zańdastyrý protsesi júrip jatyr. Osyǵan oraı, Memleket basshysynyń tapsyrmasyn iske asyrý aıasynda Tsıfrlyq damý mınıstrligi Іshki ister mınıstrligimen birlesip, azamattarǵa qyzmet kórsetý úderisin jolǵa qoıýda.
Búgin Astananyń №1 mamandandyrylǵan halyqqa qyzmet kórsetý ortalyǵyna bardym. Kólikterin zańdastyrý úshin kelgen azamattarmen jáne ortalyq mamandarymen sóılesip, qandaı máseleler bar ekenin suradym. Zańdastyrý protsesinde kólik basqa elde de tirkeýde turmaýy shart. Kóptegen azamattar osy problemaǵa tap bolady eken», - deıdi Baǵdat Mýsın.
Mınıstr qolyndaǵy kompıýtermen ınternetke kire alatyn kez kelgen adam mamandandyrylǵan halyqqa qyzmet kórsetý ortalyǵynda kórsetiletin qyzmetti óz betimen tyndyra alatynyn aıtady.
«Zańdastyrý barysynda eń aldymen kólik derekterin tekserýge eGov portaly arqyly ótinish berý kerek. Qolynda kompıýteri joq avtokólik ıeleri kez kelgen HQKO-ǵa kelip, ózine-ózi qyzmet kórsetý sektorynda ótinim bere alady. Avtokóliktiń tirkeý derekteri qatesiz toltyrylýy tıis. Maquldanǵan jaǵdaıda avtokólikti tekserý úshin mamandandyrylǵan HQO-ǵa onlaın kezekke turý qajet.
Mamandandyrylǵan halyqqa qyzmet kórsetý ortalyǵynda kólikti zańdastyrý protsesiniń qalaı júrgizilip jatqanyn kórip, avtokólikti tekserý pýnktin aralap qaıttym.
Kelýshilerge jyldam ári sapaly qyzmet kórsetý– bizdiń basty mindetimiz. Osy rette, azamattarymyzdyń jaılyǵyǵy úshin biz memlekettik qyzmet kórsetýdi jetildire túsemiz», - dep jazdy vedomstvo basshysy.
Buǵan deıin kólik zańdastyrý naýqanynyń tórtinshi kúni 1990 adam jańa nómir alǵanyn jazǵan edik.
Foto: t.me/bagdat_mussin_official