Baǵdat Mýsın memlekettik qyzmet alý protsesin jeńildetý úshin ne istelip jatqanyn aıtty

Bosanǵan ana perzenthanadan shyqqanda patronattyq medbıkege SMS jiberiletin bolady. Bul týraly Úkimet otyrysynda Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy Kazinform.

«Prezıdenttiń tapsyrmasy boıynsha azamattardyń qatysýymen fokýs-grýppalar qurdyq. Olar árbir memlekettik qyzmetti taldap, halyqqa kórsetý protsesterin qaıta qaraýda. Bul jumys 3 baǵytta júrip jatyr. Birinshiden - adamdardyń memlekettik organdarǵa barý mindetin barynsha azaıtý, ekinshiden - qujattardy talap etýdi qysqartý, úshinshiden - azamattarymyzdy artyq is-qımyldan bosatý», - dedi ol

Máselen, onyń atap ótýinshe, 9 naqty ómirlik kezeńdegi árbir jaǵdaıǵa taldaý jasalǵan.

«Nátıjesinde ne azaıdy? Memlekettik organǵa barý sany 119 dan 21-ge deıin, talap etiletin qujattar túri 102-den 11-ge deıin, jalpy qadamdar sany 600-den 175-ke deıin qysqardy. Osy jumysty jalǵastyryp jatyrmyz. Munyń bári memlekettik qyzmetti alý protsesin jeńildetip, qazaqstandyqtardy áýrege salmaı, kóńilin kóteretini sózsiz», - dedi mınıstr.

Osy oraıda Baǵdat Mýsın sábıdiń dúnıege kelýin mysalǵa keltirdi.

«Týý týraly kýálik pen járdemaqy alý úshin onyń anasy buryn ne isteıtin? Sol balany qolyna alyp, HQKO-ǵa barýǵa májbúr bolatyn. Odan soń járdemaqy alý úshin birneshe ótinish jazyp, 2 aptadaı túrli mekemeniń tabaldyryǵyn tozdyratyn. Al, qazir esh jaqqa barýdyń, ótinish jazýdyń qajeti joq. Memleket SMS arqyly anasyn quttyqtap, balaǵa at qoıýdy suraıdy. Sóıtip, JSN-de, týý týraly kýáligi de, járdemaqylar da daıyn bolady. Kelesi rette, perzenthanadan shyqqan soń ol jaıly patronattyq medbıkege SMS jiberetin bolamyz. Jyl saıyn 400 myńǵa jýyq bala týylsa, qazir olardyń 68 paıyzyna qyzmetter proaktıvti-onlaın formatta usynylǵandy», - dedi ol.