Baǵdat Mýsın qazir qaıda júr
ASTANA. KAZINFORM – Burynǵy Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın qyzmetinen bir aı buryn bosatylǵan edi.
«AQSh-ta júrgenime birneshe kún boldy. Bunda kelýime birneshe sebep bar. Árıne, kásibı máselelerdi otbasylyq máselelermen biriktirýge tyrysamyn)). Bul joly shaǵyn top bop keldik, súıiktim Dına, kenje qyzym Birǵanym jáne men. Birinshiden, kez kelgen kásipti maman retinde tehnologııalyq damýdyń aldyńǵy qatarynda bolý maǵan da qyzyq. Sol sebepti osy kúnderi Bay Area-da ótetin is-sharalarǵa qatysamyn», - dep jazdy Baǵdat Mýsın Facebook paraqshasynda.
Sondaı-aq, eks-sheneýnik kenje qyzynyń robototehnıka jarystaryna qatysatynyn aıtty.
«Dástúr boıynsha Digital Nomads-pen (bizdiń aımaqtyń Bay area-da ornalasqan IT mamandarymen) kezdesip, túrli áleýmettik bastamalardy talqylaımyz. Kezdesý biz qurǵan Silkroad ınnovatsııalyq habynyń qabyrǵasynda ótedi. Men elimizdiń Sporttyq baǵdarlamalaý federatsııasynyń basshysy bolǵandyqtan, osy jyldyń qyrkúıeginde Astanada zııatkerlik sportymyzdan (sporttyq baǵdarlamalaý) álem chempıonatynyń fınalyn ótkizýge qatysty birneshe uıymdastyrýshylyq máselelerdi sheshýge baramyn. Ol úshin men ICPC basshysy Bıll Poýchermen jáne onyń komandasymen kezdesemin», - deıdi ol.
Odan bólek, B. Mýsın AQSh-tyń birneshe oqý ornyn aralap kórmek.
«Sondaı-aq basqa elderde tsıfrlandyrýdyń negizin qalyptastyrý máselesin talqylaý úshin ártúrli ýnıversıtetterdiń professorlarymen kezdesýler ótkizýdi josparlap otyrmyn. Óıtkeni Qazaqstannyń tájirıbesin odan ári taratý qajet. AQSh ýnıversıtetteri buǵan qyzyǵýshylyq tanytady dep oılaımyn, sol sııaqty túrli qorlarmen, kompanııalarmen kezdesýler ótedi. Jalpy bul saparǵa jospar kóp. Barlyǵyn oryndaýǵa múmkindiginshe tyrysamyn», - deıdi burynǵy mınıstr.
Eske sala keteıik, bir aı buryn Baǵdat Mýsın Memleket basshysynyń jarlyǵymen laýazymynan bosatylǵan edi.
Mınıstr bul qyzmetten «óz erkimmen kettim» dep jazsa da, túrli Telegram arnalar ony «ketirdi» dep daýryqty.
Osy oraıda bizdiń agenttik onyń mınıstr bolyp júrgen kezde eldi eleń etkizgen áreketteri men bastamalaryna sholý jasady.
Aıta ketsek, Baǵdat Mýsınge qylmystyq is qozǵaldy degen qaýeset te aıtyldy.
