Baǵdat Mýsın eýropalyq spýtnık baılanysyn engizý múmkindigi týraly aıtty

Tsıfrlyq damý, ınnovatsııalar jáne aeroǵarysh mınıstri Baǵdat Mýsın elimizde eýropalyq spýtnık baılanysyn engizý múmkindigine qatysty pikir bildirdi, dep habarlaıdy Kazinform.

«Biz baılanystyń ǵaryshtyq júıelerin paıdalanyp, zerdelep te jatyrmyz. Máselen, Lıýksembýrgte tirkelgen jáne ózge de eýropalyq kompanııalar bar. Olar belgili bir qyzmetterdi usynyp otyr jáne paıdalanýǵa da bolady. Búginde Respýblıkalyq ǵaryshtyq baılanys ortalyǵy olarmen yntymaqtastyqta. Meniń túsinýimshe, Eýropalyq odaq jobasy negizinen bizdiń Ortalyq Azııanyń ózge de elderimen baılanystylyǵymyzdy jaqsartýǵa baǵyttalǵan. ıAǵnı, Qazaqstan arqyly ótetin jeli jyldam jumys isteýi kerek. Biz magıstraldyq toraptardy damytýymyz qajet», - dedi Baǵdat Mýsın vedomstvodan ótken brıfıngte agenttik tilshisiniń saýalyna oraı.

Eýropalyq Odaqtyń Qazaqstandaǵy Ókildigi yntymaqtastyq bóliminiń basshysy Iohannes Baýr EO Qazaqstandaǵy ınternet kózderin ártaraptandyrýǵa atsalysýǵa nıetti ekendigin aıtqan bolatyn. 

«Qazaqstanǵa qazir ınternet trafık Reseıden jáne Qytaıdan keledi. Bizdiń joba Qazaqstanǵa eýropalyq spýtnık baılanysyn paıdalaný múmkindigin usynǵysy keledi. Bul — eýropalyq SES kompanııasynyń ónimi. Mysaly, Starlink jerdi tómen orbıtamen aınalsa, SES spýtnıkteri orta orbıtamen aınalady. Orta orbıtadaǵy spýtnıkter búkil Qazaqstandy qamtı alady. Artyqshylyǵy sonda. Tipti búkil Ortalyq Azııany qamtıdy», — deıdi Iohannes Baýr.