Baǵdat Mýsın elimizdiń jańa +997 nómirli kodyna qatysty túsinik berdi
Májilistegi Úkimet saǵatynda depýtat Edil Jańbyrshın Qazaqstannyń halyqaralyq telefon kodyna qatysty suraq qoıdy.
«+7 telefon kodynyń aımaǵynda tek Reseı ǵana emes, Qazaqstan da kiredi. Nelikten osy kodtan kenetten bas tartý kerek dep sheshim qabyldandy? Ekinshiden, biz ondaǵan halyqaralyq kelisimge qol qoıyp, ratıfıkatsııalap otyrmyz. Bul rette telefon kodyna qatysty memleketaralyq qujatqa qol qoıýǵa ne kedergi bolyp otyr? Úshinshiden, qońyraý shalǵan kezde bizdiń elde durys ıdentıfıkatsııalaý da kelisimmen bolady. Tehnıkalyq turǵyda muny jasaý ońaı. Nelikten bul jasalmaǵan? Toq eteri, Qazaqstan +7 telefon kody aımaǵynda qala ma?», - dedi depýtat Tsıfrlyq damý mınıstrine qarata qoıǵan suraǵynda.
Óz kezeginde Baǵdat Mýsın bul suraqqa baılanysty tıisti kelisimsharttyń 11-babyn oqyp berdi.
«Kelisimniń erejelerine sáıkes, taraptardyń kez kelgeni onyń qoldanysyn toqtatý nıeti týraly habarlamany aldyn ala jibere otyryp, ony birjaqty tártippen buza alady, 6 aı buryn. ıAǵnı 6 aı buryn bizge «+7-den shyq» degen máseleni qozǵaý – osyǵan alyp keledi. Bizge shyq dep bir hatpen ǵana aıta alady. Eshqandaı memleketaralyq ratıfıkatsııadan ótkizý qajet emes. Reseı tarapynan osy hatty alsaq, +7-den shyǵarý múmkindigi bar. 2006 jyly osyndaı vedomstvoaralyq qujatqa qol qoıǵan edik. Qazaqstannyń baılanys agenttigi men Reseı tarapynan baılanys mınıstrligi osyndaı kelisimge keldi», - dedi mınıstr.
Vedomstvo basshysy +7-den basqa kodqa aýysa salý jarty jylda júzege asyrylatyn ońaı sharýa emes ekenin aıtty.
«Jarty jylda aýysyp ketý – ol óte kúrdeli suraqtardyń biri. Sondyqtan birinshi baryp, BUU janyndaǵy halyqaralyq elektr baılanys odaǵynan bizdiń jeke kodymyzdy aldym. Endi Reseı tarapymen kelissóz júrgizgende, bul kod bizde bar. Sondyqtan memlekettik rezervindegi kodtyń bolýy – bizge óte qajet. Ol Reseı tarapymen kelisimshart arqyly emes, BUU-dan berilgen kod», - dedi B. Mýsın.
«+7-niń quqyqtyq tetikteri jaǵynan qarap jatyrmyz. Sondyqtan kelissózderdi júrgizý úshin osyndaı máseleni qozǵadyq. Ratıfıkatsııadan ótkizý úshin bastapqyda Reseı tarapymen kelisip alýymyz kerekpiz. Aldaǵy ýaqytta kelissózder júrgiziledi», - dep túsindirdi mınıstr.
Budan buryn habarlanǵandaı, bıyl qyrkúıek aıynda B. Mýsın BUU janyndaǵy halyqaralyq elektr baılanys odaǵy Qazaqstanǵa jańa +997 kodyn belgilegenin aıtty.
Endi bizdiń elden basqa memleketke qońyraý shalǵanda, sheteldikterdiń telefonynda Qazaqstan degen jazý shyǵady. Sondaı-aq halyqaralyq deńgeıdegi tsıfrly servısterdi qoldanǵanda da, barlyq jerde Qazaqstan degen sıgnal shyǵady.
«Kezinde KSRO taraǵanda, +7 halyqaralyq telefon kody eki elge birdeı bekitilgen bolatyn. Biz Qazaqstanǵa ǵana tıesili halyqaralyq kodqa qol jetkizý úshin byltyrdan beri telekommýnıkatsııa salasyndaǵy kompanııalarmen birge jan-jaqty jumys júrgizip kelemiz. Osy kelissózderdiń nátıjesinde bizdiń elge derbes +997 kody bekitildi», - deıdi vedomstvo basshysy.
