Baǵdat Qojahmetov: Aýyl turǵyndaryna jyljymaly dárihanalar qyzmet kórsetetin bolady

NUR-SULTAN. QazAqparat - Shalǵaıdaǵy aýyl turǵyndaryn dárilik zattarmen jáne medıtsınalyq buıymdarmen qamtamasyz etý jyljymaly dárihanalar arqyly júzege asyrylady. Bul týraly QR Densaýlyq saqtaý mınıstrliginiń resmı ókili Baǵdat Qojahmetov aıtty, dep habarlaıdy QazAqparat tilshisi.

«Qalalar nemese úlken eldi mekender medıtsınalyq kómek kórsetý ortalyqtarymen, aýrýhanalarmen, dárihanalarmen naryqtyń suranysyna oraı qamtamasyz etilgen. Biraq, qazirgi kezde aýyldyq jerlerde, ásirese az adam turatyn shaǵyn aýyldarda medıtsınalyq kómek kórsetý joq nemese deńgeıi tómen desek bolady. Sondyqtan bul qazirgi ýaqytta Densaýlyq saqtaý mınıstrliginiń aldynda turǵan mańyzdy maqsattardyń biri sanalady. Ózderińiz biletindeı, 3,5 myńnan astam jyljymaly utqyr brıgadalar uıymdastyryldy. Olardyń eń basty maqsaty - 1 saǵattyń ishinde kez kelgen aýyldaǵy naýqasty jaqyn aradaǵy aýrýhanaǵa jetkizip, alǵashqy medıtsınalyq kómek kórsetý», - dedi resmı ókil.

Onyń aıtýynsha, aýyl halqy úshin medıtsınalyq kómektiń qoljetimdiligin qamtamasyz etý úshin 100 arnaýly avtobýs satyp alynǵan.

«Ol árbir óńirge jetkizildi. Buǵan qosa, aýdan ortalyǵynan shalǵaıdaǵy, dárihanasy joq eldi mekenderdi dárilik zattarmen, medıtsınalyq buıymdarmen qamtamasyz etý densaýlyq saqtaý uıymdary jáne jyljymaly dárihanalar arqyly júzege asyrylady. Atalǵan baǵyttaǵy sharalar iske asyrylýda», - dedi Baǵdat Qojahmetov.