Baǵdat Qojahmetov «31 arnanyń» Bas dırektory bolyp taǵaıyndaldy
qarasha. QazAqparat. «31 arnanyń Bas dırektory bolyp Baǵdat Qojahmetov taǵaıyndaldy. Bul týraly «STS Medıa» halyqaralyq medıaholdıngi (NASDAQ: CTCM) málimdedi. Jańa qyzmette onyń aldyna arnanyń bekitilgen strategııasyn júzege asyrý, kompanııanyń kontseptsııasyn jalǵastyrý, bolashaqqa jospar daıyndaýǵa belsendi qatysý jáne kórermender kórsetkishteri men qarjylyq tıimdiligin arttyrý máseleleri tur.
«STS Medıa» halyqaralyq holdınginiń Bas dırektory Anton Kýdrıashev:«Qazaqstandaǵy telearnalar arasyndaǵy básekelestiktiń jaǵdaıynda jáne kórermenderdiń yqylasyna bólený maqsatynda arnanyń ózindik obrazyn qalyptastyrý - basty másele. «31 arnamen» birlese qyzmet etken jyldar ishinde biz óte jaqsy ujym qalyptastyrdyq. Arnanyń naryqtyq ustanymdaryn nyǵaıtýǵa baǵyttalǵan bizdiń barlyq bastamalarymyz qazaqstandyq áriptesterimiz tarapynan tabysty túrde júzege asty. Osy jyldar ishinde biz arnaǵa kontent pen tehnologııa salasyn qosa alǵanda eń úzdik, eń jańashyl dúnıelerdi engizýdi mindetimiz dep sanadyq. Baǵdat Kojahmetov myrzanyń basqarý tájirıbesi mol, onyń kásibı biliktiligi men óz isine degen adaldyǵy bizge bolashaqta da úlken jetistikterge qol jetkizýge kómektesedi dep senemiz»,- dedi.
«STS Medıa» halyqaralyq holdınginiń tobyna qosylyp, 31 arnany basqarý men úshin úlken qýanysh. Búgingi kúni «31 arna» aqparattyq-oıyn-saýyqtyq formatta jumys isteıtin otandyq telearnalar arasyndaǵy jetekshi kompanııa ekendigi sózsiz. Birlesip jumys isteýdiń arqasynda telearnany telekórermenderge de, jarnama berýshilerge de tartymdy ete túsemiz dep úmittenemin. Arnanyń jumysy bekitilgen startegııa aıasynda jalǵasa beredi», dedi Baǵdat Qojahmetov .
Baǵdat Qojahmetov 1973 jyly Almaty oblysynda týǵan. 1997 jyly Qazaq ulttyq tehnıkalyq ýnıversıtetin bitirdi. 1992 - 2006 jyldar arasynda «Qazaqstan», «Astana», «Habar» telearnalarynda dıktor, aqparattyq-saraptama baǵdarlamalardyń jaýapty redaktory, prodıýser, radıo jáne telejobalardyń bas redaktory qyzmetterin atqardy.
Sońǵy bes jylda QR ІІM Til saıasaty jáne aqparat departamentiniń basshysy, «Qazaqstannyń Halyq banki» AQ-nyń Qoǵammen baılanys jáne marketıng departamentiniń dırektory, «Reıtıng plıýs» PR-agenttiginiń Bas dırektory bolyp qyzmet etti. 2004 jyly «Vmeste» halyqaralyq telekınoforýmda «Úzdik baǵdarlama júrgizýshisi» bolyp tanyldy. «Aıbyn» ordeniniń kavaleri.
