Baǵdat emhanasyndaǵy órt: 45 adam mert boldy
KAIR. QazAqparat – Senbiniń keshinde Baǵdat qalasyndaǵy koronavırýsqa shaldyqqan naýqastarǵa arnalǵan emhanadan órt shyǵyp, saldarynan birneshe adam qaza tapty, dep habarlaıdy QazAqparat Al-Hadath telearnasyna silteme jasap.
Buǵan deıin mert bolǵan 28 adam men zardap shekken 50 adam týraly habarlanǵan. Al, Iraktyń Adam quqyqtary jónindegi komıssııasynyń málimetinshe, jeksenbiniń tańynda oqıǵa saldarynan 45 adam qaza tapqan. Respýblıkanyń densaýlyq saqtaý mınıstrliginen resmı málimetter kelip túsken joq.
Baǵdattyń ońtústik-shyǵysyndaǵy Ibn-ál-Hatyb aýrýhanasyndaǵy órttiń shyǵýyna onyń ekinshi qabatynda ornalasqan jansaqtaý bólimindegi ottegi ballondarynyń jarylýy sebep bolǵan. Ekiqabatty ǵımarat tolyq órtenip ketken.
Órtti sóndirýge 30-ǵa jýyq jasaq jumyldyryldy. Kýágerlerdiń aıtýynsha, órt bastalǵanda, dúrlikken adamdar ǵımarattan shyǵatyn jer izdegen. Azamattyq qorǵanys jáne tótenshe jaǵdaılar qyzmetiniń sońǵy málimetteri boıynsha, sol kezde aýrýhanada shamamen 200 adam bolǵan.
Irak eliniń premer-mınıstri Mustafa ál-Kazymı oqıǵany jan-jaqty tergeýdi buıyrdy, búkil elde úshkúndik az tutý jarııalanǵan.
