Baǵdat Ámireev: Jibek jolynyń murasyn búkil álem kóre alar degen senimdemin
«Týrızm taqyryby bizdiń keńes úshin óte mańyzdy suraqtardyń biri. Sebebi, bizdiń keńeske múshe elder Jibek jolynyń dástúrli dańǵylynyń boıynda ornalasqan. Uly Jibek joly Marko Polo bastaǵan kóptegen álemdik jıhangezderdiń qyzyǵýshylyǵyn týdyrǵanyna tarıhtyń ózi kýá. Biz Batys pen Shyǵystyń baılanysyna muryndyq bolǵan Uly Jibek jolynyń jańǵyrýyna basa mańyz beremiz. Qazirgi tańda Jibek jolynyń tabıǵı áralýandyǵy ony biregeı jelige aınaldyryp otyr. Onyń týrıstik áleýetinde shek joq. Osy áleýetten paıda tabý úshin biz halyqaralyq týrıstik trendterdi zertteýimiz kerek», - dedi Baǵdat Ámireev.
Túrkitildes memleketterdiń yntymaqtastyǵy keńesiniń Bas hatshysy atap ótkendeı, Azııa-Tynyq muhıt aımaǵyna týrısterdiń aǵylýy artyp keledi. Jalpy, 2017 jyly halyqaralyq týrızmniń álemdik tabysy 1,6 trıllıon dollardy quraǵan.
«Osy statıstıkaǵa erekshe nazar aýdara otyryp, Túrkitildes memleketterdiń yntymaqtastyǵy keńesi týrızmdi damytýǵa baryn salyp jatyr. Ol týraly birneshe mysaldy aıta keteıin. Bizdiń keńestiń týrızm taqyrybyndaǵy otyrysy 2018 jyldyń tamyzynda Astanada ótken edi. Túrkitildes elderdiń týrıstik paketi bizdiń yntymaqtastyqtyń negizi bolarlyq mańyzdy faktor. Bul paket 15 kúnniń ishinde Túrkııadan bastap Ázerbaıjan arqyly Qazaqstanǵa burylyp, Qyrǵyzstanda aıaqtalady», - deıdi Baǵdat Ámireev.
2017 jyly túrkitildes elderdiń 11 týrıstik operatorynan turatyn kontsortsıým qurylyp, etıka kodeksin daıyndaǵan. Baǵdat Ámireevtiń aıtýynsha, týrızmdi damytýda keńeske múshe memleketter ulttyq strategııasyn ázirlep, ol qujatqa ınfraqurylymdyq damý, dıstantsııany basqarý, áleýetti arttyrý, marketıng, muralardy saqtaý salalaryna mańyz berýi kerek.
«Biz álbette, bizdiń keńeske múshe elderdiń kómegimen týrıstik paketterdi arttyratyn bolamyz. Qosymsha jobalardy ázirlep, keńeske múshe elderdi barynsha qoldaımyz. Kezinde Marko Polo Jibek jolyn sýrettegen kezde kórgenimniń jartysyn aıta almaı qaldym degen eken. Men Jibek jolynyń túrkitildes elderine qaldyrǵan muralaryn búkil dúnıe júzi halqy kóre alady degen senim bildirgim keledi», - dep túıdi Baǵdat Ámireev.
Aıta ketsek, Túrkitildes memleketter yntymaqtastyǵy keńesiniń (TMYK, Túrki keńesi) Bas hatshysy Baǵdat Ámireev resmı saparmen Qazaqstanǵa keshe kelgen bolatyn. Bul B.Ámireevtiń bıylǵy 3 qyrkúıekte Sholpan-Ata qalasynda (Qyrǵyz Respýblıkasy) ótken TMYK-tyń 6-shy Sammıtindegi taǵaıyndalýynan keıin qazaq jerine alǵashqy sapary.
Eske sala ketsek, elordada «Birlikke barar jolda» atty Jibek jolyna qatysýshy elderiniń halyqaralyq forýmy ótip jatyr.
