«Baǵdarymyz - aıqyn, bolashaǵymyz - jarqyn» - respýblıkalyq basylymdarǵa sholý
***
Keshe elordadaǵy Táýelsizdik saraıynda Elbasy N.Nazarbaevtyń QR Prezıdenti qyzmetine kirisý saltanaty ótip, onda Ult kóshbasshysy sóz sóıledi. «Egemen Qazaqstan» gazetiniń senbilik sanynda Memleket basshysynyń sóılegen sózi «Baǵdarymyz - aıqyn, bolashaǵymyz - jarqyn» degen taqyryppen berildi. «Men úshin Táýelsizdiktiń 20 jyldyǵynda Memleket basshylyǵyna búkil halyqtyń atynan saılanyp, ǵajaıyp kópultty Otanymnyń Kóshbasshysy mıssııasyn jalǵastyrý úlken abyroı. Men barlyq qazaqstandyqtarǵa ótken saılaýda shynaıy qoldaý kórsetkenderi úshin aq júrekten shyqqan rızashylyǵymdy bildiremin», - deıdi N.Nazarbaev.
«Keshe Memleket basshysy Nursultan Nazarbaev Qazaqstan Respýblıkasy Parlamenti Májilisiniń jalpy otyrysynda sóz sóılep, Parlament Májilisiniń qaraýyna Qazaqstan Respýblıkasy Premer-Mınıstriniń laýazymyna kandıdatýrany usyndy», - dep jazady «Egemen Qazaqstan» gazeti búgingi sanyndaǵy «Ekinshi márte senim kórsetildi» degen taqyryptaǵy maqalasynda. «Elimiz Konstıtýtsııasynyń 56-babyna sáıkes, Májilisten Qazaqstan Respýblıkasy Premer-Mınıstri laýazymyna Kárim Qajymqanuly Másimovtiń kandıdatýrasyn taǵaıyndaýǵa kelisim berýdi suraımyn», - dedi Prezıdent. Talqylaýdan soń Parlament Májilisi depýtattarynyń daýys berý rásimi ótti. Qatysyp otyrǵan 104 depýtattyń 104-i Qazaqstannyń Premer-Mınıstri laýazymyna K.Q. Másimovti taǵaıyndaýǵa kelisýdi qoldap daýys berdi.
***
«Alash aınasy» gazetiniń jazýynsha, elimizde kólik urlyǵy kópti alańdatyp otyr. ásirese kólik urlaý oqıǵalary Almaty qalasy men oblysynda, Shyǵys Qazaqstan men Qaraǵandy óńirinde órship tur. «Derek kózderiniń málimetterine súıensek, 2009 jyly elimizde 14 myń kólik qoldy bolǵan eken. Al ótken jyldyń nebári alty aıynda Almaty qalasynda 200-ge jýyq kólik urlanǵan. Onyń ústine, qoldy bolǵan kólikterdiń 20 paıyzy tabylmaıtyn kórinedi», - dep jazady basylym. Maqalada kóterilgen másele jaıynda tereńirek bilgińiz kelse, «Kólik urlyǵy qyzyp tur» degen maqalaǵa nazar salyńyz.
«Alash aınasy» gazetiniń turaqty «Dat!» aıdarynda Reseıdegi Qazaq mádenı ortalyqtary federatsııasynyń tóraǵasy Toqtarbaı Dúısenbaevpen aradaǵy suhbat «Reseı qazaqtarynyń 90 paıyzy Abaıdy bilmeıdi» degen taqyryppen berilgen. Suhbat barysynda jyl saıyn Reseıden qazaq tilin úırenip, ulttyq salt-dástúrmen tanysý úshin on shaqty balany ýaqytsha Qazaqstanǵa jiberetindikterin, alaıda bul sannyń mardymsyz ekendigin atap ótken ol: «Ár jazda týǵan Otanyna 100-200 baladan jiberip turatyn bolsaq, balalarymyz tez qazaqylanatyn edi. Eger sol júz balanyń ishinde, eń bolmaǵanda, jartysy Abaıdy, Maǵjandy tanyp qaıtsa, biz úshin úlken jetistik bolar edi», - deıdi.
***
Kárim Másimov Qazaqstan úkimetin eń uzaq basqarǵan premer-mınıstr retinde ǵana emes, endi eki márte osy orynǵa taǵaıyndalǵan basshy retinde de este qalmaq. «Daǵdarysqa qarsy» úkimettik komandany basqaryp, premerlik qyzmette tapjylmaı tórt jyl taban tiregen Másimovtiń úkimet basynda uzaq qalýynyń syry nede?» degen suraq jurtty oıǵa qaldyrary anyq. Osyǵan oraı «Aıqyn» gazeti Halyqaralyq táýekeldi baǵalaý tobynyń dırektory Dosym Sátpaev pen Qazaqstan Prezıdentiniń saıası máseleler jónindegi keńesshisi Ermuhamet Ertisbaevtyń pikirin bilgen. Nazar salyńyz, eki saıasatkerden alynǵan shaǵyn suhbat «Másimovtiń qaıta taǵaıyndalýynyń máni nede?» degen taqyryppen jarııalandy.
«Birikken Arab ámirliginiń Ábý-Dabı qalasynda dzıýdodan Azııa chempıonaty óz máresine jetti. Sary qurlyqtyń beldi balýandarynyń basyn qosqan jarys tartysty ótti. Ár memleketten at terletip kelgen maıtalman mamandar men qatardaǵy qarapaıym kórermenderge deıin chempıonattyń uıymdastyrylý deńgeıine joǵary baǵa berdi. Al beldesýge bel býǵandar arasynan biz Olımpıada oıyndary men álem chempıonattary jáne qurlyqtyq dodalarda olja salǵan saqa sportshylardy kóptep kezdestirdik», - dep jazady «Aıqyn» gazeti. Maqala «Azııa chempıonaty aıaqtaldy» degen taqyryppen berilgen.
***
Qazaqstan Prezıdenti Nursultan Nazarbaevtyń atyna memleket, úkimet basshylarynan, halyqaralyq uıymdardyń jetekshilerinen saılaýdaǵy jeńisine baılanysty quttyqtaýlar kelip túsýde. Solardyń birparasy «Kazahstanskaıa pravda» gazetinde jarııalandy. Máselen, Memleket basshysy Nursultan Nazarbaevty saılaýdaǵy senimdi jeńisimen Reseı Federatsııasy Úkimetiniń Tóraǵasy Vladımır Pýtın quttyqtady. Quttyqtaýda: «Qurmetti Nursultan Ábishuly, Daýys berý nátıjesi Sizdiń Qazaqstan halqy aldyndaǵy joǵary bedelińizdi tolyqtaı dáleldedi. Memlekettiń qurylýynda tamasha jeńister, sezilip otyrǵan ekonomıkalyq ilgerileýshilik jáne Qazaqstan Respýblıkasynyń táýelsiz damý jyldarynda qol jetkizilgen azamattardyń ómir súrý jaǵdaıynyń jaqsarýy Sizdiń atyńyzben tikeleı baılanysty» delingen.
