«Baǵdarsham jáne onyń dostarynyń bastan keshken hıkaıalary» atty mýltfılmniń tusaýkeseri boldy
ASTANA. 16 naýryz. QazAqparat/Aınur Kenebaeva/ - Búgin Astanada QR Ulttyq akademııalyq kitaphanasynda «Baǵdarsham jáne onyń dostarynyń bastan keshken hıkaıalary. Qaýipsizdik beldikteri» atty mýltıplıkatsııalyq fılmniń tusaýkeseri boldy.
«Shevron» kompanııasynyń ıdeıasy bolyp tabylatyn mýltfılm jobasyn QR BǴM jáne QR ІІM qoldaýymen «Bilim» telearnasy júzege asyrdy.
2010 jyly «Shevron» kompanııasynyń qarjylyq qoldaýymen «Baǵdarsham jáne onyń dostarynyń bastan keshken hıkaıalary» mýltıplıkatsııalyq fılminiń birinshi bólimi jaryqqa shyqqan bolatyn. Joba sheńberinde mýltfılm kóshirmeleri jol qaýipsizdigi erejeleriniń oqý-ádistemelik quraly retinde Astana men Almaty qalalarynyń mektepke deıingi bilim berý mekemeleri men oqý oryndaryna taratylǵan bolatyn.
Qazirgi tańda balalardyń joldaǵy qaýipsizdigi eń ózekti máselelerdiń qatarynda. QR Jol polıtsııasy komıtetiniń derekteri boıynsha, 2010 jyly balalardyń qatysýymen 1814 jol-kólik oqıǵasy tirkelgen. Oqıǵa nátıjesinde 1804 bala jaraqat alyp, 188 bala qaza tapqan.
Joba avtorlarynyń pikirinshe, jol qaýipsizdigi erejelerin saqtaý mádenıetin bala sanasynda erte jastan qalyptastyrý kerek, sondyqtan da atalmysh mýltfılm jas búldirshinderdi jol erejesin saqtaýǵa baýlyp, qoǵam nazaryn joldaǵy balalar qaýipsizdigi máselesine aýdarýǵa septigin tıgizbek.
«Bul mýltfılm - jol qozǵalysy erejelerine úıretetin ınteraktıvti oqytý quraly bolyp tabylady. Mýltfılm qazaq jáne orys tilderinde jas kórermender nazaryna usynylyp, balalar qatysýmen bolatyn jol- kólik apattarynyń aldyn alýdyń bir jolyna aınalady dep senemiz», - dedi «Shevron» kompanııasynyń Qazaqstandaǵy ókildiginiń basshysy Zamıra Qanapııanova.
