Baǵdadtaǵy jarylystar saldarynan 20 adam qaza tapty
ASTANA. 19 qańtar. QazAqparat - Senbi kúni Baǵdad qalasynda jeti avtomobılge qoıylǵan jarylǵysh zattardyń jarylýy men eki qarýly shabýyldyń saldarynan 20 adam qaza bolyp, 60 adam jaraqattandy,
dep habarlady ITAR-TASS «Ál-Arabııa» telearnasyna silteme jasap.
Qalanyń ár túrli aýdandarynda az ǵana ýaqyt aıyrmashylyǵymen oryn alǵan avtomobılder jarylysy halyqtyń arasynda dúrbeleń týǵyzdy. Osy jaǵdaıdy paıdalanǵan qarýly toptar túrme men iri saýda ortalyǵyna oq jaýdyrǵan.
Irakta terrorıstik aktilerdiń kóbeıýin Anbar provıntsııasynda 2013 jyldyń 21 jeltoqsanynda bastalǵan lańkestikke qarsy sharalarmen baılanystyrady. «As-Sahva» súnnıtter jasaǵynyń jaýyngerleri ulttyq qaýipsizdik kúshterimen birige otyryp, eldi mekenderdi birtindep terrorısterdiń qursaýynan bosatýda. Anbar provıntsııasy Iraktaǵy beımaza aýdan, ol buryn «Ál-Kaıdanyń» basty bekinisi bolǵan.
