Baǵanyń ózgerýine tarıfter ósimi men maýsymdyq jaǵdaı áser etti - Bıshimbaev
ASTANA. QazAqparat - Qarashada ınflıatsııa 7,5 paıyzdy qurady. Bul týraly Úkimet otyrysynda QR Ulttyq ekonomıka mınıstri Qýandyq Bıshimbaev málim etti, dep habarlaıdy QazAqparat.
«Resmı statıstıkalyq málimetter boıynsha jyl basyna qaraǵanda qarashada ınflıatsııa 7,5 paıyzdy qurady. Ótken aıda azyq-túlik taýarlarynyń baǵalary 2 paıyzǵa ósti, al azyq-túlik emes taýarlar 0,9 paıyzǵa jáne aqyly qyzmetter 0,5 paıyzǵa joǵarylady. Jyl basyna qaraǵanda qarashada áleýmettik mańyzy bar azyq-túlik taýarlarynyń baǵa ındeksi 11,2 paıyzdy qurady»,-dep toqtaldy mınıstr.
Onyń sózine qaraǵanda, qyrkúıek-qarasha kezeńinde eń joǵary ósim taýyq jumyrtqasyna, ıaǵnı 34 paıyz deńgeıinde tirkeldi. Qara shaı - 11,7 paıyzǵa, taýyq eti - 5,1 paıyzǵa, irimshik - 4,4 paıyzǵa ósti.
«Jyl basynan barlyq 33 áleýmettik mańyzy bar taýarlardy alyp qaraıtyn bolsaq, tutyný baǵysynyń joǵary ındeksi Astanada, Taldyqorǵanda, Qaraǵandyda baıqalady», - dedi Bıshimbaev.
Budan bólek ol bıylǵy qyrkúıek-qarashada baǵasy tómendegen taýarlarǵa jeke toqtaldy. Osy oraıda pııaz - 18,5 paıyzǵa, sábiz - 15,3 paıyzǵa, kartop - 11,1 paıyzǵa, sondaı-aq qant - 9,5 paıyzǵa arzandady.
Onyń aıtýynsha, baǵanyń ózgerýi turǵysynda ishki faktorlarǵa maýsymdyq jaǵdaılar, tabıǵı monopolııalar tarıfteriniń ósimi, janar-jaǵarmaı baǵasynyń joǵarylaýy yqpal etti. Al syrtqy faktorlarǵa keıbir shıkizat túrlerine álemdik bırjalyq baǵanyń ósýi áser etip otyr.
