Baǵanyń bassyz ketkenine Forbes tizimindegi olıgarhtar kináli – Májilis depýtaty
Saýda ortalyqtarynyń qojaıyndary memlekettiń ishinen qoǵamnyń eshbir talabyna baǵynbaıtyn memleket quryp alǵan. Májilis depýtaty Baqqoja Anas saýda saıasatyn damytý máselelerine arnalǵan Úkimet saǵatynda osyndaı pikir bildirdi, dep habarlaıdy Kazinform.
«Búginde baǵanyń kóterilgenine saýda ortalyqtary men saýda úıleri, solardyń qojaıyndary kináli dep ashyq aıta alam. Saýda ortalyqtarynyń qojaıyndarynyń bári – Forbes tizimindegi olıgarhtar. Olar memlekettiń ishinen qoǵamnyń eshbir talabyna baǵynbaıtyn memleket quryp alǵan.
2018 jyly saýda ortalyqtaryndaǵy dúńgirshekterdi jalǵa berý quny 1 sharshy metrine 4 myń teńge bolsa, qazir 21 myń teńge - 5 ese ósken. Saldarynan kıim-keshektiń baǵasy jyl saıyn ósip jatyr. Mysaly, 2018 jyly shulyqtyń baǵasy - 300 teńge bolsa, qazir - 1500 teńge.
Kóp býtıkterde esepteýish qural joq. Saýda ortalyqtary sony paıdalanyp, kommýnaldyq tólemderge oıyna kelgen baǵany qoıady. Arany ashylǵany sonshalyq, jalǵa berý baǵasyn qymbattatqanymen qosa 2-3 aı aldyn ala depozıt talap etedi. Osylaısha mańdaıy terlemesten mıllıardtap paıda taýyp otyrǵan saýda ortalyqtary memleketke salyq tólemeýdiń de amalyn jaqsy oılastyrǵan», - dedi ol.
Baqqoja Anas saýda ortalyqtarynyń kóbi jalǵa berý aqysyn qolma-qol aqshamen alyp otyrǵany da zańsyz áreket ekenin atap ótti.
«Saýda ortalyqtarynyń kóbi jalǵa berý aqysyn qolma-qol aqshamen alyp, býtıkterdi ózderi ashqan jeke kásipkerlik nysandar arqyly sýbarendaǵa berip, kiristerin jasyryp otyr. Osynyń bárine narazy bolǵan saýdagerlerdi saýda úıinen shyǵaryp tastaımyz dep qorqytyp otyr. Jumyssyzdyq kesirinen amalsyz saýdaǵa ketken halyq osylaısha saýda ortalyqtarynyń aıtqanyna, lańyna kónip otyr. Osy saýda ortalyqtaryn qashan retke qoıasyzdar? Saýda nysandarynda saýdagerlermen birge qoǵamdyq baqylaý ornatyp, salyq revızııasyn jasaýǵa daıynsyzdar ma?» - dep surady depýtat.
Saýda jáne ıntegratsııa mınıstri Arman Shaqqalıev bıyldan bastap salyq revızııasy bastalǵanyn eske saldy. Sondaı-aq, saýda ortalyǵyndaǵy núkteni sýbarendaǵa berýge zańmen tyıym salynǵanyn atap ótti. Vedomstvo basshysy saýda ortalyqtarynyń monopolııasyn kópformatty saýda-sattyqty damytý arqyly ǵana shekteýge bolatynyn aıtady.
