Baǵany negizsiz kótergen áýekompanııaǵa monopolııaǵa qarsy den qoıý sharalary qoldanylady
Áýekompanııa baǵany negizsiz kóterse, monopolııaǵa qarsy den qoıý sharalary qoldanylady. Bul jaıynda Májilis depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy Kazinform.
«Fly Arystan» tarıftik jelisi ózgergen joq. Alaıda halyq tarapynan suranystyń ózgerýi jáne jolaýshylar sanynyń jyl saıynǵy ósýi avıabıletterdiń túpkilikti qunyna áser etedi. Máselen, «Fly Arystan» aqparaty boıynsha Astana-Aqtóbe baǵyty boıynsha (qashyqtyq 1 007 shaqyrym) eń tómengi tarıf 8 581 teńgeden 50 081 teńgege deıin, Almaty-Atyraý baǵyty boıynsha (qashyqtyq 2 003 shaqyrym) 15 328 teńgeden 63 538 teńgege deıin. Qazaqstandyq avıatasymaldaýshylar suranystyń maýsymdylyǵy, belgili bir kezeńder úshin suranystyń eleýli aýytqýy, áýe kemesiniń túri, oryndardyń sany, reıstiń ushý ýaqyty, sondaı-aq áýe bıletterin satyp alý kúni (ushýǵa deıingi kúnder sany) sııaqty naryqtyq faktorlar negizinde aıqyndalatyn dınamıkalyq baǵa belgileýdi paıdalanatynyn atap ótken jón», - dedi Úkimet basshysy jaýabynda.
Sonymen qatar Premer-Mınıstr halyqaralyq tájirıbege sáıkes áýe bıletterine baǵa belgileý zańmen rettelmeıtinine nazar aýdartady.
«Bul rette, eger áýekompanııa baǵany negizsiz kóterse, Kásipkerlik kodekske sáıkes monopolııaǵa qarsy den qoıý sharalary qoldanylady. Osyǵan, áýe kemelerine, olarǵa qosalqy bólshekter men tehnıkalyq qyzmet kórsetý qunynyń artýyna qaramastan, qazaqstandyq áýekompanııalardyń bıletteriniń quny ózgergen joq», - dedi Álıhan Smaıylov.
