Baǵany baqylaý: Qytaı marketpleıster úshin jańa erejeler engizdi
ASTANA. KAZINFORM – Qytaıda marketpleıster men onlaın platformalarǵa arnalǵan jańa erejeler 2026 jyldyń 10 sáýirinde kúshine enedi. Bul erejeler baǵa belgileýdiń ashyqtyǵyn arttyrýǵa jáne satýshylar men tutynýshylardy qorǵaýdy kúsheıtýge baǵyttalǵan, dep habarlaıdy Kazinform menshikti tilshisi.
Qujatqa sáıkes, platforma operatorlary men olarmen jumys isteıtin satýshylar baǵany belgileý kezinde zańdylyq, ádildik jáne ashyqtyq qaǵıdattaryn ustanýǵa mindetti. Marketpleısterge satýshylardyń baǵa saıasatyna negizsiz aralasýǵa, sonyń ishinde baǵany tómendetýge májbúrleýge, arzandatýdyń avtomattandyrylǵan júıelerin engizýge, trafıkti shekteýge, izdeýde pozıtsııalrdy tómendetýge, dúkenderdi buǵattaýǵa nemese ónimderdi alyp tastaýǵa tyıym salynady.
Baǵadaǵy kemsitýshilikke qarsy kúreske erekshe nazar aýdaryldy. Erejeler satyp alýshynyń habarynsyz derekterge, algorıtmderge nemese paıdalanýshy profılderine negizdelgen birdeı mámile sharttarynda tutynýshylar úshin birdeı ónimge nemese qyzmetke ártúrli baǵalardy belgileýge tikeleı tyıym salady. Dınamıkalyq baǵa belgileýdi qoldanýǵa da shekteýler engiziledi.
Qujatta baǵa belgileý talaptary kúsheıtildi. Marketpleıster men satýshylar taýarlar men qyzmetterdiń tolyq baǵasyn, sonyń ishinde jetkizý jáne basqa da ilespe alymdardy kórsetýge, sondaı-aq jeńildikter, aktsııalar jáne sýbsıdııalar sharttaryn ashyp kórsetýge mindetti. Kez kelgen qosymsha aqyly qyzmetter naqty kórsetilýi tıis.
Jańa erejeler sonymen qatar ádiletsiz baǵa básekesine, sonyń ishinde básekelesterdi yǵystyrý úshin taýarlardy ózindik qunynan tómen satýǵa, baǵamen aıla-sharǵy jasaýǵa, ónim tapshylyǵy týraly jalǵan aqparat taratýǵa jáne ásirese tótenshe jaǵdaı kezinde baǵany ádeıi kóterýge tyıym salady.
Tutynýshylardy qorǵaý úshin avtomatty tólemder men jazylymdarǵa qosymsha talaptar engizilip jatyr. Platformalar paıdalanýshylarǵa tólem somasy men kúni týraly aldyn ala habarlaýy jáne mundaı qyzmetterden bas tartý úshin qarapaıym jáne túsinikti mehanızm usynýy tıis.
Erejeler bes jyldyq merzimge arnalǵan jáne elektrondyq kommertsııa men tsıfrlyq qyzmet kórsetýdiń qarqyndy damýy aıasynda Qytaıdyń platformalyq ekonomıkasyn retteýdiń negizgi quralyna aınalady.
Buǵan deıin Qytaı dári-dármek baǵasyn tirkeý júıesin iske qosqanyn jazdyq.
