Baǵanashyldan balalar kóshirilmek bolǵan Qonaevtaǵy jańa ǵımaratta kimder turady

QONAEV. KAZINFORM – Qonaev qalasynda ata-ananyń qamqorlyǵynsyz qalǵan balalar úshin jańa ǵımarat salyndy. Almaty oblysy ákimdiginiń málimetinshe, 180 orynǵa arnalǵan jańa ǵımarat jeke ınvestorlar esebinen salynyp, memleket menshigine berilgen.

Kazinform agenttigi Almaty oblysynyń bilim basqarmasyna saýal joldap, Qonaev qalasyndaǵy jańa ǵımarat qalaı qoldanylyp jatqanyn naqtylady. Vedomstvo jaýabyna sáıkes, nysan oblystyq arnaýly áleýmettik qyzmetterdi qajet etetin balalardy qoldaý ortalyǵyna berilgen.

- Qazirgi ýaqytta ortalyq ǵımaratynda ata-ananyń qamqorlyǵynsyz qalǵan jáne ómirlik qıyn jaǵdaıǵa tap bolǵan balalar tárbıelenip jatyr. Ortalyqtyń paıdalaný maqsaty ózgermeıdi, oblys boıynsha jetim, ata-anasynyń qamqorlyǵynsyz jáne ómirlik qıyn jaǵdaıda qalǵan balalar tárbıelenedi. Qazirgi tańda ortalyqta barlyǵy 35 bala turady, - delingen basqarma jaýabynda.

Eske salsaq, munda bıyl shilde aıynda oblysqa qarasty «Baǵanashyldaǵy» balalar úıiniń tárbıelenýshileri kóshirilmek boldy. Alaıda balalar bul áreketke narazylyq bildirdi. Prezıdent tapsyrmasymen balalar úıi Almatydan kóshirilmeıtin boldy. Qala ákimdigi nysandy óz qaramaǵyna alyp, jóndeý jumystaryn júrgizgeli jatyr.

«Baǵanashyldaǵy» balalar úıiniń tárbıelenýshileri Qonaevqa aýyspaǵanymen, Almaty qalasyndaǵy kámeletke tolmaǵandardy beıimdeý ortalyǵynan 30-dan astam bala kóshti. Olar 2022 jyly Almaty oblysy ákimshilik turǵyda bólingennen keıin ýaqytsha «Baǵanashylǵa» ornalastyrylǵan. Ortalyqtaǵy 41 balanyń 9-y óz erkimen Almatyda qalǵan. Qonaevqa kóshken 32 balanyń 8-in ata-anasy alyp ketken. Taǵy 4-i qorǵanshylyqqa berilse, 3-i kolledjge túsken. Al ortalyqta 17 bala qalǵan.

Aıta keteıik, «Baǵanashyl» balalar úıindegi daýdan keıin úsh sheneýnik qyzmetinen bosatyldy.