Baǵanashyldaǵy balalar úıinde qazir jaǵdaı qalaı
ALMATY. KAZINFORM — Almatyda ornalasqan oblystyq Balalar úıiniń tárbıelenýshileri Qonaev qalasyna kóshýge narazylyq bildirdi.
Prezıdent keńesshisi — baspasóz hatshysy Rýslan Jeldibaı Prezıdent tapsyrmasymen «Baǵanashyl» balalar úıi Almatydan Qonaevqa kóshirilmeıtinin málimdedi.
Balalar úıiniń tárbıelenýshisi Kırıl Kapranov áleýmettik jelide beınejazbasy keńinen taraǵan janjaldyń qalaı bastalǵanyn túsindirdi.
— Tańerteń balalardy alyp ketýge 3 avtobýs keldi. Biz olardyń kirgenine qarsy boldyq. Biraq Kámeletke tolmaǵandardy beıimdeý ortalyǵynda ýaqytsha turyp jatqan 3-18 jasqa deıingi balalardy alyp ketetin bolyp eki avtobýs kirdi. Birine uldar, birine qyzdar kirdi. Sol kezde osynda polıtsııa da keldi. Biz qalǵysy keletin balalar bolsa, oılansyn dep avtobýsty jarty saǵat jibermedik. Sol kezde polıtsııa qyzmetkerleri bizdi ıtere bastady, — dedi ol.
Onyń aıtýynsha, Qonaev qalasyna barýǵa bas tartyp, 4 qyz avtobýstan shyqqan. Sodan keıin avtobýstar Balalar úıiniń aýmaǵynan shyǵyp, ekiara kıkiljiń toqtaǵan.
Kırıl Kapranov Balalar úıiniń tárbıelenýshileri Prezıdent tapsyrmasyn qýana qabyldaǵanyn atap ótti.
— Men osynda qalǵan balalardyń bárin jınap, Prezıdenttiń tapsyrmasyn oqyp berdim. Balalar ony estigende qýandy, tipti kózine jas alǵandar da bar. Meniń munda turyp jatqanyma 2 jyl boldy. Sol ýaqyttyń ishinde bul jer meniń úıime aınalyp ketti. Bizdiń tilegimiz Memleket basshysyna jetkenine qýanyshtymyz. Qazir bári óz bólmesinde, kúndelikti sharýalarymen aınalysyp jatyr, — dedi 15 jastaǵy tárbıelenýshi.
Mekeme tárbıeshisi Ásel Jýaspaevanyń aıtýynsha, pedagogtarǵa 11 tamyzǵa deıin jańa jumys ornyna kóshýge qanshalyqty daıyn ekenderin sheshýge ýaqyt berilgen.
— Jańa ǵımaratta bolǵan joqpyz, tek áleýmettik jeliden kórdik. Balalardy qalaı tasymaldaıdy, muǵalimder qalaı kóshetini týraly resmı aqparat bolǵan joq. Bizge tek 11 tamyzǵa deıin ol jerge jumysqa baramyz ba, joq pa degen suraqqa jaýap berý kerek ekenin habarlady, — deıdi ol.
Sonymen qatar Ásel Jýaspaeva qazirgi Balalar úıi jańa bolmasa da, apattyq jaǵdaıda dep oılamaıdy.
— Kóshirýdiń sebebi ǵımarattyń apattyq jaǵdaıy dep ataldy. Iá, men munda jumys istegen barlyq 13 jyl ishinde kúrdeli jóndeý jasalǵan joq. Degenmen, biz jyl saıyn qolymyzdan kelgenshe jóndeý jumystaryn júrgizemiz. Ǵımarat kúrdeli jóndeýdi qajet etedi, biraq ǵımarat berik, barlyq standart boıynsha salynǵan. Munda tipti jer silkinisi onsha sezilmedi. Qandaı da bir qorytyndy berý úshin sarapshy emespin, bul - meniń jeke pikirim, — dedi ol.
Qazir tárbıeleýshiler jáne eresek tárbıelenýshilerdiń bir toby Qonaev qalasyna ketken balalardyń qaıtyp kelgenin kútip júr.
Eske salaıyq, bıyl naýryz aıynda Almaty oblysynyń № 1 balalar úıiniń tárbıelenýshileri ǵımarattyń Almatydan Qonaevqa kóshiriletinine narazy boldy.
Keıin № 1 balalar úıiniń tárbıelenýshileri Almatyda qalatyn boldy.
Alaıda Almaty oblysy ákiminiń 2025 jylǵy 9 shildedegi qaýlysy jáne bilim basqarmasynyń 10 shildedegi buıryǵy negizinde tárbıelenýshilerdi kezeń-kezeńimen Konaev qalasyndaǵy jańa zamanaýı balalar úıine kóshirý jumystary bastaldy.
Aıta ketelik Dınara Zákıeva almatylyq balalardy kóshirýge qatysty pikir bildirgen edi.