«Baǵanashyl» balalar úıiniń jańarǵan ǵımaraty 2026 jyly paıdalanýǵa beriledi
ALMATY. KAZINFORM – «Baǵanashyl» balalar úıiniń tárbıelenýshileri ýaqytsha basqa ǵımaratqa kóshirildi.
Kazinform agenttiginiń saýalyna jaýap bergen Almaty qalasynyń bilim basqarmasy «Baǵanashyl» shaǵyn aýdany, Syrǵabekov kóshesi, 22 úıde ornalasqan balalar úıi osy jyldyń tamyz aıynda Almaty qalasynyń kommýnaldyq menshigine berilgenin habarlady.
- Balalar úıi ǵımaratynyń qurylys-montajdaý jumystary 2025 jyldyń qarasha aıynda bastalyp, aıaqtalýy 2026 jyldyń tórtinshi toqsanyna josparlanǵan, - delingen vedomstvo jaýabynda.
Almaty ákimdigi senbi kúni balalar úıiniń tárbıelenýshiler ýaqytsha №1 arnaıy mektep-ınternatyna kóshirilgenin habarlaǵan edi. Qazirgi ýaqytta ortalyqta 100 bala bar, olardyń ishinde 13-i mektepke deıingi jasta, 87-si mektep oqýshylary.
Eske salaıyq, osy jyldyń 21 shildesinde «Baǵanashyl» balalar úıiniń tárbıelenýshileri Almatydan Qonaevqa kóshirile bastady. Alaıda balalar buǵan narazylyq bildirip, áleýmettik jelide mekeme ishindegi kıkiljińniń beınejazbasy tarady. Keıin Prezıdent keńesshisi — baspasóz hatshysy Rýslan Jeldibaı Prezıdent tapsyrmasymen «Baǵanashyl» balalar úıi Almatydan Qonaevqa kóshirilmeıtinin málimdedi.
«Baǵanashyl» balalar úıindegi daýdan keıin úsh sheneýnik qyzmetinen bosatyldy.