«Baǵanashyl» balalar úıiniń tárbıelenýshileri jóndeý kezinde Almatyda oqýyn jalǵastyrady

ALMATY. KAZINFORM — «Baǵanashyl» balalar úıiniń tárbıelenýshileri Almaty qalasynda bilim alýyn jalǵastyrady.

«Baǵanashyl» balalar úıiniń tárbıelenýshileri jóndeý jumystary kezinde olardy bir-birinen ajyratpaýdy surap, beıneúndeý túsirdi.

Almaty ákimdiginiń jaýabyna sáıkes, qazirgi tańda qala men oblys ákimdikteri nysandy Almatynyń qaramaǵyna berý jumystaryn júrgizip jatyr. Tárbıelenýshilerge zamanaýı ári qaýipsiz jaǵdaı jasaý maqsatynda balalar úıiniń ǵımaratyna keshendi qaıta jańǵyrtý jumystary josparlanyp otyr.

— Tehnıkalyq zertteý, jobalaý-smetalyq qujattama daıyndaý, memlekettik saraptamadan ótkizip, tıisti konkýrstyq rásimderden ótkennen keıin ǵana jóndeý jumystary kelesi jyly bastalady. Jóndeý-qalpyna keltirý jumystary kezinde balalardy ýaqytsha ornalastyrý máselesi qaýipsizdik talaptary men qajetti turmys jaǵdaıyn eskerile otyryp sheshiledi. Balalar birinen biri ajyrap qalmaıdy, — dep habarlady ákimdikten.

Sonymen qatar tárbıelenýshiler Almatyda ózderi oqyp júrgen mektepte bilim alýyn jalǵastyrmaq. Qala basshylyǵy balalar úıiniń ǵımaratynan balalardy Qonaev qalasyna kóshirý máselesi qarastyrylyp jatpaǵanyn atap ótti.

— Balalardyń qaýipsizdigi men jaıly ómir súrý jaǵdaıyn qamtamasyz etý Almaty qalasy ákimdiginiń jáne Oqý-aǵartý mınıstrliginiń basty nazarynda. Balalardyń oqýy men turmys jaıy árdaıym jiti baqylaýda bolady, — dep túsindirdi Almaty ákimdigi.

Eske salaıyq, Almatyda ornalasqan oblystyq Balalar úıiniń tárbıelenýshileri Qonaev qalasyna kóshýge narazylyq bildirdi.

Prezıdent tapsyrmasymen «Baǵanashyl» balalar úıi Almatydan Qonaevqa kóshirilmeıtin boldy.

Keıin Kámeletke tolmaǵandardy beıimdeý ortalyǵyndaǵy 39 bala Qonaevqa kóshti.