«Baǵanashyl» balalar úıiniń tárbıelenýshileri ýaqytsha basqa mekemege kóshiriledi

ALMATY. KAZINFORM – «Baǵanashyl» balalar úıiniń tárbıelenýshileri ǵımaratta jóndeý jumystaryna baılanysty ýaqytsha №1 mektep-ınternatqa kóshiriledi. 

Bul týraly Almaty ákiminiń orynbasary Azamat Qaldybekov málimdedi. Onyń aıtýynsha, qazirgi ýaqytta nysandy jóndeýdiń jobalyq-smetalyq qujaty daıyn, al jóndeý jumystaryn júrgizý mindettemesin «Integra Construction KZ» JShS óz moınyna alǵan.

– Kompanııa jóndeýdi balalar basqa mekemege kóshirilgen soń bastaıdy, - dedi Qaldybekov Óńirlik kommýnıkatsııalar qyzmetinde ótken brıfıng kezinde.

Almaty bilim basqarmasynyń basshysy Saıran Saıfedenovtiń aıtýyna qaraǵanda, balalar osy aptada kóshiriledi.

– Bul balalar úıi bizdiń kúndelikti baqylaýymyzda. Qazirgi ýaqytta tárbıelenýshilerdi №1 ınternatqa kóshirý týraly sheshim qabyldandy. Bul mekemede «Januıa» kesheniniń 90-nan astam tárbıelenýshisi turyp kelgen. Eki apta buryn mektep-ınternatta jóndeý jumystaryn júrgizip, 1 100 sharshy metr aýmaq pen 18 bólmeni daıyndadyq. Osy aptanyń sońynda balalardy kóshirýdi josparlap otyrmyz, - dedi ol.

Eske salaıyq, 21 shilde kúni «Baǵanashyl» balalar úıiniń tárbıelenýshileri Almatydan Qonaevqa kóshirile bastady. Alaıda balalar buǵan narazylyq bildirip, áleýmettik jelide mekeme ishindegi kıkiljińniń beınejazbasy tarady.

Keıin Prezıdent keńesshisi — baspasóz hatshysy Rýslan Jeldibaı Prezıdent tapsyrmasymen «Baǵanashyl» balalar úıi Almatydan Qonaevqa kóshirilmeıtinin málimdedi.