«Baǵanashyl» balalar úıiniń qyzmetkerleri qaıda jiberiletini aıtyldy

ASTANA. KAZINFORM — Almatydaǵy «Baǵanashyl» balalar úıiniń qyzmetkerleri Almaty qalasy bilim Basqarmasyna qarasty uıymǵa jumysqa ornalastyrylady

Búgin Almaty qalasy máslıhatynyń depýtattary men Qoǵamdyq keńes músheleri, sondaı-aq, QR Oqý-aǵartý mınıstrliginiń Balalardyń quqyǵyn qorǵaý komıtetiniń, Almaty qalasy jáne Almaty oblysy bilim basqarmalarynyń ókilderi «Baǵanashyl» shaǵynaýdanyndaǵy «Arnaıy áleýmettik qyzmetterge muqtaj balalardy qoldaý oblystyq ortalyǵy» KMM ujymymen jeke kezdesý ótkizdi.

Kezdesýde balalar úıiniń jumysyna qatysty ózekti máseleler talqylandy. Ortalyqtyń qyzmetkerlerine (pedagogtarǵa) Almaty oblysynan Almaty qalasy Basqarmasyna qarasty uıymǵa aýystyrylyp, eńbek quqyǵy saqtalyp, qoldanystaǵy zańnamaǵa sáıkes eńbek sharttary qaıta rásimdeletindigi jáne bul jeke jazbasha kelisim arqyly júzege asyrylatyny jetkizildi.

— Balalar úıi qyzmetkerlerin jumystan bosatý týraly aqparat shyndyqqa sáıkes kelmeıdi. Sondaı-aq, «Baǵanashyl» balalar úıiniń tárbıelenýshileri óz Ortalyǵynyń aýmaǵynda tura beredi jáne Almaty qalasynda bilim alady. Balalardyń qaýipsizdigin jáne olarǵa laıyqty jaǵdaı jasaýdy qamtamasyz etý — qala ákimdiginiń jáne Oqý-aǵartý mınıstrliginiń basty basymdyǵy. Jaǵdaı turaqty baqylaýda bolady, — delingen qala ákimdigi taratqan aqparatta.

Eske salaıyq, Almatyda ornalasqan oblystyq Balalar úıiniń tárbıelenýshileri Qonaev qalasyna kóshýge narazylyq bildirdi.

Prezıdent tapsyrmasymen «Baǵanashyl» balalar úıi Almatydan Qonaevqa kóshirilmeıtin boldy.

Keıin Kámeletke tolmaǵandardy beıimdeý ortalyǵyndaǵy 39 bala Qonaevqa kóshti.

Al «Baǵanashyl» balalar úıiniń tárbıelenýshileri jóndeý kezinde Almatyda oqýyn jalǵastyrady.