«Baǵanashyl» balalar úıine baılanysty ýákiletti tulǵalarǵa qatysty qyzmettik tekserý bastaldy

ALMATY. KAZINFORM — Almaty oblysynyń ákimdigi Almaty qalasynan Qonaevqa «Baǵanashyl» balalar úıiniń tárbıelenýshilerin kóshirý týraly qoǵamdyq talqylaýǵa baılanysty málimdeme jasady.

Oblys ákimdiginiń málimetinshe, Memleket basshysy Qasym-Jomart Toqaevtyń tapsyrmasymen balalardy kóshirý rásimin toqtatý týraly sheshim qabyldandy. Balalar burynǵy mekenjaıynda turyp, oqýyn jalǵastyrady. Zańnamada kepildik berilgen jetim balalardyń barlyq quqyǵy tolyq kólemde qamtamasyz etiledi. Sonymen qatar nıet bildirgen balalar qazirgi zaman talaptaryna tolyq saı keletin Qonaev qalasyndaǵy jańa oblystyq balalar úıine ornalasa alady.

— Jedel keńes ótkizilip, onyń barysynda basqarýshylyq sheshimderde qatelikke jol bergen ýákiletti tulǵalarǵa qatysty qyzmettik tekserý júrgizý jáne jaýapkershilik sharalaryn anyqtaý tapsyryldy. Atalǵan máselege jaýapty qyzmetkerler tártiptik jaýapkershilikke tartylady, — dep habarlady ákimdikten.

Odan bólek oblys ákimdigi «Baǵanashyl» balalar úıiniń ǵımaratyn berý máselesi memlekettik organdar arasynda pysyqtaý satysynda ekenin málimdedi.

— Memleket qamqorlyǵyndaǵy tárbıelenýshilerdiń — áleýmettik qyzmetterdiń tolyq spektrin alýy, medıtsınalyq qyzmetpen qamtylýy, sondaı-aq keıinnen turǵyn úı alý úshin kezekke qoıylýy qoldanystaǵy zańnamaǵa sáıkes tolyq saqtalady, — delingen jaýapta.

Eske salaıyq, keshe Almatyda ornalasqan oblystyq Balalar úıiniń tárbıelenýshileri Qonaev qalasyna kóshýge narazylyq bildirdi.

Prezıdent tapsyrmasymen «Baǵanashyl» balalar úıi Almatydan Qonaevqa kóshirilmeıtin boldy.

Keıin Kámeletke tolmaǵandardy beıimdeý ortalyǵyndaǵy 39 bala Qonaevqa kóshti.