«Baǵanashyl» balalar úıindegi daýdan keıin úsh sheneýnik qyzmetinen bosatyldy
QONAEV. KAZINFORM – Almatydaǵy balalar úıinen tárbıelenýshilerdi Qonaevqa kóshirý kezinde týyndaǵan daýǵa baılanysty Almaty oblysy ákiminiń orynbasary jáne eki basqarmanyń basshysy qyzmetinen bosatyldy.
Oblystyq bilim basqarmasynyń jaýabyna sáıkes, QR Prezıdenti Ákimshiliginiń kelisimi boıynsha oblys ákiminiń orynbasary Bolat Kúreńbekov qyzmetinen bosatyldy.
– Sondaı-aq bilim basqarmasynyń basshysy Saltanat Bespaeva men ishki saıasat basqarmasynyń basshysy Erik Ábitov qyzmetterinen ketti. Oblys ákiminiń birinshi orynbasaryna qatań sógis jarııalandy, - dep habarlady basqarmadan.
Bolat Kúreńbekov 2024 jyldyń tamyz aıynan beri ákimniń orynbasary qyzmetin atqardy.
Saltanat Bespaeva 2022 jyldyń maýsymynan beri bilim basqarmasyn, al Erik Ábitov 2024 jyldyń sáýirinen beri ishki saıasat basqarmasyn basqarǵan.
Eske salaıyq, 21 shilde kúni «Baǵanashyl» balalar úıiniń tárbıelenýshileri Almatydan Qonaevqa kóshirile bastady. Alaıda balalar buǵan narazylyq bildirip, áleýmettik jelide mekeme ishindegi kıkiljińniń beınejazbasy tarady.
Keıin Prezıdent keńesshisi — baspasóz hatshysy Rýslan Jeldibaı Prezıdent tapsyrmasymen «Baǵanashyl» balalar úıi Almatydan Qonaevqa kóshirilmeıtinin málimdedi.
Sonymen qatar «Baǵanashyl» balalar úıine baılanysty ýákiletti tulǵalarǵa qatysty qyzmettik tekserý bastaldy.