«Baǵanashyl» balalar úıi Almatydan Qonaevqa kóshirilmeıtin boldy

ASTANA. KAZINFORM - QR Prezıdentiniń keńesshisi – Baspasóz hatshysy Rýslan Jeldibaı «Baǵanashyl» balalar úıi Almatydan Qonaevqa kóshirilmeıtinin málimdedi.

- «Baǵanashyl» balalar úıiniń tárbıelenýshilerin Almatydan Qonaev qalasyna kóshirýge baılanysty jaǵdaımen tanysqan Qasym-Jomart Toqaev Almaty qalasynyń ákimi Darhan Satybaldyǵa oqýshylardyń ońtústik astanada bilim alýyn jalǵastyrý úshin balalar úıine jóndeý jumystaryn júrgizýdi jáne atalǵan nysandy qalanyń balansyna alýdy tapsyrdy, - delingen jazbada.

Baspasóz hatshysy Memleket basshysynyń tapsyrmasyna sáıkes, balalar úıi kóshirilmeıtinin habarlaǵan.

- Atalǵan jaǵdaıǵa baılanysty Prezıdent Ákimshiligi qyzmettik tekseris júrgizedi. Ata-anasynyń qamqorlyǵynsyz qalǵan balalardyń zań sheńberindegi barlyq quqyǵy tolyq saqtalady, - dep tolyqtyrǵan Rýslan Jeldibaı.

Aıta keteıik, buǵan deıin Qonaevqa kóshirilgen balalar úıiniń ǵımaraty Almatyǵa beriletinin jazǵanbyz.