«Baǵanaly ordam - basty ordam» atty aqyndar aıtysy bastaldy

Bul jyr dodasynda elimizdiń eń myqty sýyryp salma aqyndary ózara synǵa túsýde. Aıtys jankúıerleri sahna tórinde osy kezge deıin talaı aıtystarda top jarǵan, kópshilikke keńinen tanymal 12 aqynnyń jyrynan sýsyndamaq. Sol 12 aqynnyń ishinde Aıbek Qalıev, Sara Toqtamysova, Meıirbek Sultanhan, Aspanbek Shuǵataev, Erkebulan Qaınazar sııaqty sózge sheshen, tilge baı, eliniń ótkeni men búginin tolǵaıtyn oraq tildi, qarsylastaryn ázil jyrlarymen alyp ta, shalyp ta qaǵytatyn shyn júırikter bar.

Aqyndar aıtysy ataýly dataǵa oraılastyrylyp otyrǵandyqtan, aıtystyń basty taqyryby elimizdiń jetistikteri men damý perspektıvalary, sondaı-aq, egemendi elimizdiń qalyptasý tarıhy bolmaq. Aqyndarǵa qoıylatyn talap: olar qoǵamdy alańdatyp otyrǵan ózekti máselelerdi jyrǵa qosady. Aıtyskerler óz oılaryn sulý sózben órip, tapqyr oıdy órnekti tilmen jetkizip, óz tyńdarmandaryn qýantýy tıis.

«Baǵanaly ordam - basty ordam» aqyndar aıtysynyń ádil qazylar alqasynyń quramynda tanymal sýyryp salma aqyn, qazaq halqy shyǵarmashylyǵynyń osy bir erekshe túrin zerttep júrgen ǵalym Amanjol Áltaev, QR halyq aqyny Qonysbaı Ábilov, belgili aıtyskerler Dáýletkereı Kápuly, Serikzat Dúısenǵazın bar.

Esterińizge sala keteıik, dástúr boıynsha Astana qalasynyń ákimdigi aqyndar aıtysyn Elorda kúnin merekeleý aıasynda osymen onynshy ret ótkizip otyr.