Bagam araldaryndaǵy daýyl qutqarý jumystaryn da tas-talqan etti
NUR-SULTAN. QazAqparat - Bagam araldaryndaǵy qutqarý jumystary ýaqytsha toqtap qaldy. Kóshelerge kólge aınalyp, kólikter batyp ketken. Daýyldan keıin emhana, qoǵamdyq oryndar men ǵımarattardyń bári derlik sýǵa batty, dep habarlaıdy New York Times.
Dorıan daýylynan keıingi Bagam araldarynda teńiz tolqyp, qatty jel soǵýda. Eske sala keteıik, jeksenbiden bastap Bagam araldarynyń soltústik-batysynda ornalasqan Abako jáne Grand-Bagam araldaryn daýyl talqandap ketti. Bul – besinshi kategorııaly, Atlantıkada tirkelgen eń joıqyn daýyldardyń biri. Basylym bergen aqparat boıynsha, Úlken Bagam araldarynyń 60 paıyzy qazir sýdyń astynda qaldy.
Bagam araldary Ulttyq qaýipsizdik mınıstri Marvın Deımstiń habarlaýynsha, Abakoda 7 adam qaza tapqan. «Onyń ishinde balalar da bar» dedi mınıstr.
Maıamı daýyldardy zertteý ortalyǵynyń ókilderi Dorıan daýylynyń qazirgi kategorııasyn 2-shi satyda dep baǵalady, ol sársenbige deıin Florıdaǵa jyljýy tıis edi. Meteorologtar daýyldyń kúshi saıabyrsydy degenimen, ol qutqarý jumystaryna kedergi keltirip, toqtatyp tastaýǵa ıtermeledi.
Bagam araldarynyń astanasy Nassaý qalasynda kómek kórsetý agenttigi qurylǵan. Alaıda, jeldiń qatty soǵýy saldarynan tikushaqtar zardap shekken aımaqtarǵa jete almady. Admıral Todd Sokalzýk sheneýnikterge qońyraý shalyp, shatyrdyń tóbesinde otyrǵan, kómek surap jatqan turǵyndardyń kóp ekenin aıtty.
Basylymnyń habarlaýynsha, samosval jáne órt sóndirý kólikteri sý basqan kósheler arqyly qutqarý jumystaryn jasaýǵa talpynýda.
Abako jáne Grand-Bagam araldary eń joǵarǵy núktede, 30 fýt bıiktikte ornalasqan. Al daýyldyń saldarynan kúshpen aqqan sý 23 fýt bıiktikti basyp qalǵan. Dorıan daýyly saǵatyna 185 mıl jerge jetetin jyldamdyqpen soqqan. Eń sońǵy ret mundaı joıqyn apat Bagam araldarynda 1935 jyly tirkelipti.
