Baǵaly metaldar men asyl tastardyń erkin aınalymy qamtamasyz etiledi - Beıbit Atamqulov

NUR-SULTAN. QazAqparat – Parlament Májilisiniń jalpy otyrysynda «Eýrazııalyq ekonomıkalyq odaq sheńberinde baǵaly metaldarmen jáne asyl tastarmen operatsııalardy júzege asyrý erekshelikteri týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Kelisimge Eýrazııalyq ekonomıkalyq odaqqa qatysýshy elder arasynda 2019 jylǵy 22 qarashada Máskeý qalasynda qol qoıyldy.

«Kelisimniń maqsaty – atalǵan salada múshe memleketterdiń básekelestik artyqshylyǵyn jasaý jáne tıimdi sharalar ázirleýge baǵyttalǵan saýda-ekonomıkalyq tetikter qalyptastyrý. Sondaı-aq, Odaqtyń kedendik aýmaǵynda baǵaly metaldar men asyl tastardyń erkin aınalymyn qamtamasyz etý úshin jaǵdaı jasaý. Qujat baǵaly metaldar, asyl tastar jáne olardan jasalǵan buıymdardyń ishki naryǵyna qatysty quqyqtyq negizder men talaptardy aıqyndaıtyn 18 baptan turady», - dedi QR Indýstrııa jáne ınfraqurylymdyq damý mınıstri Beıbit Atamqulov.

Kelisim erejeleri aıasynda mámileler jasaý jáne asyl tastardyń jikteý ári qundyq sıpattamalaryn anyqtaý, zergerlik jáne basqa da buıymdardy (EAEO ishinde ákelingen nemese óndirilgen) synamalaý, taldaý ári tańbalaý, baǵaly metaldar men asyl tastardyń zańsyz aınalymy úshin sharalar qoldaný eskerilgen.

«Kelisim EAEO-nyń zergerlik buıymdarynyń ishki naryǵyndaǵy saýdada múshe memleketterdiń synamalyq tańbalaryn ózara tanýdyń bolmaýyna baılanysty týyndaıtyn shekteýlerdi joıady. ıAǵnı, eger zergerlik buıym Qazaqstanda jasalsa jáne synalsa, ol buıymdy EAEO-ǵa qatysýshy elderde ótkizý barysynda qaıta synamalaý qajeti bolmaıdy. Synamalyq tańbalardy ózara taný bastapqy sholý saparlarynan keıin (quramyna EAEO-nyń barlyq elderiniń ókilderi kiredi) qamtamasyz etiledi. Múshe memleketterdiń Kelisim erejelerin qanshalyqty oryndap jatqanyn anyqtaý úshin ondaı saparlar bes jylda bir ret ótkizilip turady. Sondaı-aq, qujat óńdelmegen tabıǵı almastardy Odaqqa múshe bir memleket aýmaǵynan ekinshisine tasymaldaýdy qarastyrady. Ol óńdelmegen tabıǵı almastardy sertıfıkattaýdyń halyqaralyq kestesi – Kımberlıı protsesi talaptaryna sáıkes iske asyrylady», – dedi mınıstr.

Onyń sózine qaraǵanda, Kımberlı protsesine qatysýshy árbir el almastyń birde-bir partııasy oǵan qatyspaıtyn tarapqa ımporttalmaıtynyna nemese eksporttalmaıtynyna kepildik beredi. Eýrazııalyq ekonomıkalyq odaqqa qatysýshy barlyq el - Kımberlıı protsesiniń múshesi.

Sonymen qatar Kelisim aıasynda tıisti aqparatty almasý qarastyrylǵan.

«Bul normalar tolyq esep júrgizýge jáne sybaılas jemqorlyqqa qarsy is-qımyl jasaýǵa múmkindik beredi. Sondaı-aq Kelisim elde óndiriletin altyndy satyp alýda qatysýshy memleketterdiń basym quqyǵyn moıyndaıdy», - dedi B. Atamqulov.