Baǵaly metaldar men asyl tastar týraly zań qabyldandy - Senat
ASTANA. QazAqparat - Búgin Parlament Senatynyń jalpy otyrysynda «Baǵaly metaldar men asyl tastar týraly» QR Zańy qabyldandy. Endi qujat Memleket basshysynyń qol qoıýyna joldanady.
Parlament qabyldaǵan zań elimizdegi altynnyń ishki naryǵyn damytýǵa, Qazaqstan aýmaǵynda óndiriletin, shyǵarylatyn qazaqstandyq altyny bar shıkizattardy elimizde óńdeý úshin jaǵdaılar jasaýdy qamtamasyz etedi. Sonymen qatar, baǵaly metaldar men asyl tastardy óndirý jáne olardyń aınalymy, baǵaly metaldarmen jáne asyl tastarmen operatsııalardy memlekettik retteý jáne baqylaý júzege asatyn bolady.
Investıtsııalar jáne damý mınıstri Áset Isekeshevtiń aıtýynsha, Memleket basshysynyń tapsyrmasyna sáıkes, Qazaqstannyń altyny tolyǵymen elimizdiń aýmaǵyna óńdelýi tıis. Ekinshiden, Eýrazııalyq ekonomıkalyq odaq aıasynda osy saladaǵy qatynastardy ulttyq zańnamamen retteý qajettigi týyndaǵan. Óıtkeni bundaı zańnamalar Reseı men Belarýs elderinde bar, ıaǵnı atalǵan elder altyndy tek óz elderinde ǵana óńdeıdi. Osyǵan oraı, zań jobasyndaǵy normalarmen qazaqstandyq zaýyttardy shıkizatpen qamtý tolyq qarastyrylyp otyr.
Sonymen qatar zań jobasynda Úkimettiń, Ulttyq banktiń, baǵaly metaldar men asyl tastar aınalymy salasyndaǵy ýákiletti organnyń quzyretin aıqyndap, osy saladaǵy zańnamany buzǵandarǵa jaýaptylyq belgilenedi. Ulttyq bank baǵaly metaldar aktıvterin tolyqtyrý úshin, baǵaly metaldar óndirisi sýbektilerimen jáne qaıta óńdeý nátıjesinde menshik ıeleri bolǵan tulǵalarmen affınırlengen altyndy satyp alý jóninde mámileler jasasýǵa memlekettiń basym quqyǵy belgilenedi. Sonymen qatar qujatta Qazaqstannyń aýmaǵynda óndirilgen jáne ótkiziletin baǵaly metaldar men asyl tastardan jasalǵan zergerlik buıymdardy synamalaý, olardy tańbalaý mindeti qarastyrylady. Ondaı ataýly tańbalar ýákiletti uıymda tirkelýge mindetti bolady.
