Baǵaly qaǵazdar naryǵyn damytýdyń negizgi baǵyttary talqylandy
QR Qarjy naryǵyn retteý jáne damytý agenttiginiń tóraǵasy Mádına Ábilqasymova qarjy sektorynyń jáne Qazaqstan qor bırjasynyń (KASE) qatysýshylarymen ótkizilgen dóńgelek ústelde baǵaly qaǵazdar naryǵyn damytýdyń negizgi baǵyttaryn talqylady.
Mádına Ábilqasymova negizgi bırjalyq kórsetkishterdiń 2019 jylǵy oń serpinin atap ótti. Máselen, 2019 jyly aktsııalar naryǵyn kapıtaldandyrý 17,2 trln teńgege deıin 11%-ǵa ulǵaıdy, KASE aınalystaǵy korporatıvtik oblıgatsııalar kólemi 12,1 trln teńgege deıin (12%) ulǵaıdy. Bul rette aktsııa naryǵyn kapıtaldandyrý jáne aınalystaǵy korporatıvtik oblıgatsııalar kólemi ІJÓ-ge qatysty 2019 jyldyń qorytyndysy boıynsha 47%-ǵa jýyq boldy.
Agenttik tóraǵasy qazirgi ýaqytta qarjy sektoryn damytý boıynsha baǵaly qaǵazdar naryǵyn orta merzimdi perspektıvada damytýdyń negizgi basym baǵyttaryn kórsete otyryp keshendi baǵdarlamalyq qujattyń ázirlenip jatqanyn habarlady jáne naryq qatysýshylaryna ony daıyndaýǵa qatysýdy usyndy.
«Agenttik qarjy naryǵyna qatysýshylardy teńgerimdi retteý saıasatyn júrgizýge nıetti, onda, bir jaǵynan, qarjylyq turaqtylyq máseleleri eskeriledi, al ekinshi jaǵynan – qarjy naryǵyn damytýǵa nazar aýdarylady. Biz naryq usynystaryna daıynbyz jáne bizdiń aldymyzǵa qoıylǵan mindetterdi iske asyrý úshin belsendi túrde yntymaqtastyq jasaýǵa nıettimiz», – dedi ol.
Qarjy naryǵynyń ókilderi baǵaly qaǵazdar naryǵyn damytý jáne retteý máselelerinde oń ózgeristerdi atap óte otyryp, baǵaly qaǵazdar naryǵyn odan ári damytý boıynsha birqatar usynystar jáne sheshýdi talap etetin problemalar týraly aıtty.
Máselen, «Qazaqstan qarjygerleriniń qaýymdastyǵy» ZTB tóraǵasy E. Bahmýtova qor naryǵynyń ótimdiligin qamtamasyz etý úshin memlekettik baǵaly qaǵazdar boıynsha kiristilik qısyǵyn qalyptastyrýdyń mańyzdylyǵyn atap ótti.
«Qazirgi ýaqytta Qazaqstan Respýblıkasy Qarjy mınıstrliginiń Baǵaly qaǵazdar shyǵarylymy kestesinde merzimi 5 jylǵa deıingi qysqa merzimdi jáne orta merzimdi qaǵazdardyń úlesi óte tómen, al dál osy baǵaly qaǵazdar barynsha ótimdi jáne kiristilik qısyǵyn qurýǵa kóp dárejede áser etedi», – dedi ol.
Óz kezeginde, KASE Basqarma tóraǵasy A. Aldambergenniń oıynsha, qoldanystaǵy kedergilerdi eńserý úshin ekonomıkanyń naqty sektory kásiporyndarynyń arasynda qor naryǵynyń quraldaryn ilgeriletýde memlekettiń belsendi róli talap etiledi.
«Qosa qarjylandyrý tetigin engizý qajet, ol kezde kompanııa memlekettik baǵdarlamalar sheńberinde qarjylandyrý alý úshin baǵaly qaǵazdardy shyǵarý arqyly qor naryǵynda qarajattyń bir bóligin tartýǵa tıis», – dep esepteıdi ol.
Sonymen qatar dóńgelek ústelge qatysýshylar baǵaly qaǵazdar naryǵynyń ınfraqurylymyn damytý jáne táýekelge baǵdarlanǵan qadaǵalaýdyń úzdik praktıkalaryna ótý arqyly retteýdi jetildirý boıynsha usynystardy aıtty. Prýdentsııalyq retteý jáne KJTQK rásimderi, qor naryǵynda tsıfrlandyrýdy damytý jáne eseptilikti ońtaılandyrý bóliginde baǵaly qaǵazdar naryǵynyń jalpy máseleleri talqylandy.
Dóńgelek ústeldiń qorytyndysyn shyǵara otyryp, M. Ábilqasymova naryq ókilderi aıtqan usynystardyń kóp jaǵdaıda agenttiktiń bastamalaryna sáıkes keletinin jáne qarjy naryǵyn damytýdyń jańa tujyrymdamasynda kórinis tabatyndyǵyn atap ótti.
