Baǵalar derekter bazasy bıýdjet shyǵynyn 200 mlrd teńgege deıin qysqartýy múmkin
ASTANA. KAZINFORM – Qarjy mınıstrligi Baǵalar derekter bazasyn engizip jatyr. Júıe marketpleıster men basqa da derekkózderden alynǵan málimetter negizinde taýar baǵalaryn baqylap, taldaýǵa múmkindik beredi.
Qarjy vıtse-mınıstri Áset Turysovtyń sózinshe, platforma memlekettik satyp alýlar kezinde taýarlardyń naryqtaǵy naqty qunyn anyqtaýǵa kómektesedi.
- Mysaly, memlekettik organ taýar satyp alǵanda qazir kommertsııalyq usynystarǵa súıenedi. Baǵalar derekter bazasy arqyly bul baǵalardyń naryqtyq deńgeıge sáıkestigin qosymsha tekserýge bolady, – dedi ol Ortalyq kommýnıkatsııalar qyzmetindegi brıfıngte.
Onyń aıtýynsha, júıeni engizý nátıjesinde jyl saıyn 200 mlrd teńgege deıin únemdeýge múmkindik bar.
- Ulttyq taýarlar katalogy keńinen qoldanylyp, jasandy ıntellekt arqyly derekter sapasy jaqsarǵan saıyn bıýdjettik josparlaý tıimdirek bolady. Qural qazirdiń ózinde paıdalanylyp jatyr jáne aldaǵy ýaqytta onyń múmkindikteri keńeıtiledi, – dedi Áset Turysov.
Buǵan deıin bólip tóleýge qosylý úshin bıznes qandaı tekseristen ótetinin jazdyq.
