Baǵalanbaı qalǵan batyrlar: Jumash RAHMETOV

ASTANA. QazAqparat - Jeńis kúni qarsańynda «QazAqparat» HAA esimi umyt qalǵan Keńes Odaǵynyń Batyrlary týraly materıaldar jarııalaıdy. Materıaldardy jarııalaýǵa «Baǵalanbaı qalǵan batyrlar» jınaǵynyń avtory Berik Ábdiǵalıuly kómek kórsetti.

Berik Ábdiǵalıulynyń atap ótýinshe, bul jınaqta sóz qozǵalatyn batyrlardyń esimi jalpaq jurtqa málim emes. Olardyń atymen atalǵan kóshe nemese mektepter joq. Qan maıdanda erlik kórsetkenin janyndaǵy joldastary kórse de, shtab jáne partııa basshylyǵy olardy moıyndamaǵan. Bizdiń mindetimiz - tarıhı shyndyqqa jetý úshin olar jaıynda keleshek urpaqqa áńgimelep berý.

Jumash RAHMETOV - búkil Ortalyq Azııa men Qazaqstan boıynsha Ekinshi dúnıejúzilik soǵystyń as-tankısteri tizimine engen birden bir adam. 1919 jyly Qaraǵandy oblysy Qarsaqbaı aýdanynyń 6-shy aýylynda dúnıege kelgen. 1941 jyly Syzran tank ýchılışesin bitirgen.

J. Rahmetov pen ol basqarǵan ekıpaj 11 jaý tankisin, dzottaryn, júzdegen ofıtserleri men soldattarynyń kózin joıǵan. 1942 jyly 23 jeltoqsanda Kalının oblysy Olenın aýdany Vereısta derevnıasy mańynda qaza tapqan. Qyzyl Juldyz, І dárejeli Otan soǵysy ordenderimen marapattalǵan. 1943 jyly 25 qańtarda korpýs komandıri, general-leıtenant M. Katýkov aǵa leıtenant J. Rahmetovti Keńes odaǵynyń batyry ataǵyna usynǵanymen usynys joǵaryda bekimeı qalǵan.