Baǵaǵa baqylaý júrgizetin negizgi memlekettik organ aıqyndalady

NUR-SULTAN. QazAqparat – Shekteý qoıylǵan kepildiktegi aktıvterdi ekonomıkalyq aınalymǵa qaıtarý týraly zań jobasy ázirlenedi. Bul týraly Úkimet otyrysynda QR Ulttyq ekonomıka mınıstri Áset Erǵalıev málim etti, dep habarlaıdy QazAqparat tilshisi.

Mınıstrdiń aıtýynsha, Prezıdent Joldaýyn iske asyrý jalpyulttyq josparynyń birinshi baǵytynda 27 is-sharany iske asyrý kózdelgen.

«Kásipkerlikti damytý úshin «Qarapaıym zattar ekonomıkasy» jáne «Bıznestiń jol kartasy» baǵdarlamalaryn 2022 jyly iske asyrý jalǵasatyn bolady. Jalpy alǵanda, qarjylandyrý kólemi keminde 1 trln teńgeni quraıdy. Memleket qarjysynyń tıimdiligin arttyrý maqsatynda Memleket qarjysyn basqarý tujyrymdamasy ázirlenedi. Tujyrymdama bıýdjet saıasatyn, memlekettik boryshty basqarý, sondaı-aq Ulttyq qordyń qarajatyn qalyptastyrý jáne paıdalaný máselelerin qamtıdy. «Óndirýshiden tutynýshyǵa deıin» tizbegi boıynsha baǵalardy biryńǵaı baqylaý úshin negizgi memlekettik organ aıqyndalatyn bolady», - dedi ol.

Á.Erǵalıevtiń atap ótýinshe, «Jeke qosalqy sharýashylyqtar týraly» Zań ázirlenedi. Aýyl sharýashylyǵynda sýbsıdııalaý tetikterin uzaq merzimge bekitý de kózdelip otyr.

«Tsıfrlandyrý jónindegi ulttyq jobanyń aıasynda keminde 100 myń joǵary bilikti ІT-mamanyn daıarlaý, tsıfrlyq saladaǵy qyzmetter men taýarlardyń eksportyn 2025 jylǵa qaraı keminde 500 mıllıon dollarǵa deıin jetkizý josparlanýda. Investorlarǵa keshendi servıstik qoldaý kórsetý maqsatynda Ulttyq geologııalyq qyzmet qurylady. Shekteý qoıylǵan kepildiktegi aktıvterdi ekonomıkalyq aınalymǵa qaıtarý týraly zań jobasy ázirlenedi. Otandyq ónerkásip úshin shıkizat taýarlar baǵasynyń qoljetimdiligin jáne kóleminiń jetkiliktiligin qamtamasyz etý boıynsha is-sharalar daıyndalady», - dedi mınıstr.