Baǵa jaǵynan eń qoljetimdi otandyq kólikter tizimi jarııalandy
NUR-SULTAN. QazAqparat – «QazAvtoÓndiris» odaǵy avtokólik naryǵynyń baǵa dınamıkasyna qatysty statıstıkamen bólisti, dep habarlaıdy QazAqparat tilshisi.
Avtokólik salasyndaǵy odaqtyń málimetine súıensek, qazaqstandyqtar byltyr jalpy 654,3 mlrd teńgege 71 417 jeńil jáne jeńil kommertsııalyq avtokólik satyp alǵan.
«Satyp alynǵan avtokóliktiń árqaısysynyń ortasha quny 8,9 mln teńgeni qurady. Bul aldyńǵy jyldyń kórsetkishimen salystyrǵanda 5,7 paıyzǵa artyq. Importtyq avtokóliktiń ortasha baǵasy shamamen 10,9 mıllıon teńgeni qurap otyr. 2019 jyldyń qorytyndysy boıynsha satyp alýshylardyń 27 paıyzy quny 5 mıllıon teńgeden aspaıtyn avtokólikti ıelengen. Sol sekildi satyp alýshylardyń 15,8 paıyzy 7-den 10 mln teńgege deıingi avtokólikti tańdady», - dep habarlaıdy «QazAvtoÓndiris» odaǵynan.
Sonymen birge bıznes-klass (10-15 mln tg) pen premıým-klass (15 mln tg joǵary) segmentindegi kólikterdiń úlesi jańa avtokólikter naryǵynda 26,2 paıyzdy (18 679) jáne 10,7 paıyzdy (7 640) quraǵan.
«Jolaýshylarǵa arnalǵan eń qoljetimdi kólikterdiń ondyǵy pozıtsııasyn otandyq avtoóndirýshiler ustap tur. Osylaısha, quny 2,7 mln teńgeden bastalatyn óskemendik Lada Granta - qoljetimdiligi boıynsha kóshbasshy sanalady. Eń arzan 10 kóliktiń tizimin Lada 4x4 (3,4 mln teńge), Ravon Nexia (3,5 mln teńge), Chevrolet Niva (4,17 mln teńge), Ravon R2 (4,2 mln teńge), Ravon R4 (4.21 mln teńge), Lada Largus (4.3 mln teńge), Lada XRAY (4.4 mln teńge), Lada Largus LCV (4.9 mln teńge) jáne UAZ Patriot Pickup (5.8 mln teńge) quraıdy», - delingen habarlamada.
Elde satylyp jatqan eń qymbat kólik modelderiniń tiziminde Lexus LS (56,7 mıllıon teńge), Porsche Panamera (56,3 mıllıon teńge), Porsche Cayenne (43,8 mıllıon teńge), Lexus LX (40,5 mıllıon teńge), Audi Q8 (39) mıllıon teńge), BMW 8 serııasy (37,8 mıllıon teńge), Land Rover Range Rover (37 mıllıon teńge), Cadillac Escalade (34,3 mıllıon teńge), BMW X7 (33 mıllıon teńge) jáne Lexus GX (32,3 mıllıon teńge) tur.
Foto: kapitalist.tv
