Baǵa turaqtylyǵynda táýekelder saqtalyp otyr — Ulttyq bank
ASTANA. KAZINFORM — Bıyl 9 aıdyń qorytyndysynda jalpy ishki ónim 4,2 paıyzǵa ósti. Bul týraly Quryltaı otyrysynda «2027-2029 jyldarǵa arnalǵan respýblıkalyq bıýdjet týraly» zań jobasyn tanystyrǵan Ulttyq bank tóraǵasynyń orynbasar Erulan Jamaýbaev aıtty.
— Qazirgi tańda jahandyq ekonomıka turaqsyzdyq, geosaıası shıelenis jáne saýda saıasatyndaǵy qolaısyzdyqtar aıasynda damyp otyr. Halyqaralyq valıýta qorynyń boljamy boıynsha álemdik ekonomıka ósimi bıyl 3,1 paıyzdy, kelesi jyly 3,4 paıyz. Jahandyq ınflıatsııa osy jyly 4,7 jáne 2027 jyly 4,1 bolady dep kútilip otyr. Syrtqy syn-qaterlerge qaramastan elimizdiń ekonomıkasynda oń dınamıka saqtalyp otyr. Ótken 9 aıdyń qorytyndysy boıynsha jalpy ishki ónim 4,2%-ǵa ósti. Jyldyq ınflıatsııa 12 aı qatarynan baıaýlap, 9,3 paıyz boldy. Azyq-túlik taýarlarynyń baǵasy 8,5%-ǵa, azyq-túlikke jatpaıtyn taýarlar 11%-ǵa, aqyly qyzmetter 8,9%-ǵa artty, — dedi ol.
Erulan Jamaýbaevtyń aıtýynsha, ınflıatsııanyń baıaýlaýyna Ulttyq banktiń júrgizip jatqan aqsha-kredıt saıasaty, teńge baǵamynyń nyǵaıýy, artyq ótimdilikti qysqartý sharalary men Úkimetpen birlesip atqarylyp jatqan is-sharalar oń yqpal etip otyr.
— Osyǵan baılanysty biz 4 qazanda bazalyq mólsherlemeni 16,25%-ǵa deıin tómendettik. Degenmen, baǵa turaqtylyǵynda táýekelder saqtalyp otyr. Sondyqtan ınflıatsııany ornyqty túrde tómendetý jáne qarjy naryǵyn damytý boıynsha keshendi jumystardy jalǵastyramyz, — dedi UB tóraǵasynyń orynbasary.
Buǵan deıin Quryltaı otyrysynda qandaı zań jobalary qaralatynyn jazǵan edik.
